प्रतिनिधिसभा बैठक आज ११ बजे, बजेटमाथि छलफल अनिश्चित

काठमाण्डौ । संघीय संसद् प्रतिनिधिसभाको आज बिहान ११ बजे बस्ने बैठकमा आगामी आर्थिक वर्षको बजेटमाथि छलफल अघि बढाउने कार्यसूची तय भएपनि राजनीतिक टकरावका कारण बैठकको सञ्चालन नै अनिश्चित बनेको छ।  

संसद् सचिवालयका अनुसार बजेटमाथि सांसदहरूले उठाउने प्रश्नहरूको जवाफ अर्थमन्त्री डा. स्वर्णिम वाग्लेले दिने तयारी गरिएको छ।

सरकार पक्षले बजेटलाई “आर्थिक स्थिरता र विकासको आधार दस्तावेज” का रूपमा अघि बढाउने प्रयास गरिरहे पनि संसद्भित्रको निरन्तर अवरोधले प्रक्रिया प्रभावित बनेको छ।  

कार्यसूचीअनुसार अर्थ विधेयक फिर्ता नभएको जानकारी गराउने, चलचित्र विधेयकलाई समितिमा पठाउने तथा प्रधानमन्त्री तथा मन्त्रिपरिषद्को कार्यालयबाट प्राप्त कार्यभार सम्बन्धी जानकारी प्रस्तुत गर्ने तयारी छ।

त्यसैगरी विनियोजन विधेयक र राष्ट्र ऋण उठाउने विधेयकसमेत आजको बैठकमा प्रस्तुत गर्ने सम्भावना रहेको संसद् सचिवालयले जनाएको छ।  

तर, यी सबै आर्थिक तथा नीतिगत विषय छलफलमा प्रवेश गर्न सक्ने अवस्था अझै स्पष्ट छैन।

पछिल्ला दिनदेखि प्रतिपक्षी दलहरूले प्रधानमन्त्री बालेन्द्र शाहको सीमा सम्बन्धी अभिव्यक्तिलाई लिएर कडा आपत्ति जनाउँदै संसद् अवरुद्ध गर्दै आएका छन्।  

उनीहरूले उक्त अभिव्यक्ति सच्याउनुपर्ने माग राख्दै संसदीय प्रक्रियालाई अघि बढ्न नदिने अडान लिएका छन्।

यसैबीच, सरकार र प्रतिपक्षबीच संवाद प्रयास भएपनि सहमति नजुट्दा संसद् “नीति निर्माणको थलो” भन्दा बढी राजनीतिक दबाब र टकरावको मैदान बनेको टिप्पणी राजनीतिक वृत्तमा बढेको छ।  

बजेट जस्तो संवेदनशील आर्थिक एजेन्डा नै रोकिँदा शासन सञ्चालन र विकास प्रक्रिया प्रभावित हुने चिन्ता समेत व्यक्त गरिएको छ।

हालसम्मको अवस्था हेर्दा आजको बैठक कार्यसूचीमा प्रवेश गर्छ वा फेरि अवरुद्ध हुन्छ भन्ने विषय राजनीतिक सहमतिमा निर्भर देखिएको छ।