रोजगारी सिर्जना र सीप विकासमा सरकार–निजी क्षेत्र सहकार्य बढाउने विषयमा छलफल

काठमाण्डौ । युवा, श्रम तथा रोजगार मन्त्री रामजी यादवको अध्यक्षतामा बुधबार सरकार र निजी क्षेत्रबीच रोजगारी सिर्जना तथा सीप विकासका विषयमा अन्तरक्रिया तथा छलफल सम्पन्न भएको छ।

छलफलमा सांसद विदुषी राणा, अनुष्का श्रेष्ठ, नेपाल उद्योग वाणिज्य महासङ्घका अध्यक्ष, नेपाल चेम्बर अफ कमर्सका अध्यक्ष तथा विभिन्न व्यावसायिक सङ्घ–संस्थाका पदाधिकारीहरूको सहभागिता रहेको थियो।

कार्यक्रममा Workplace-Based Training र Apprenticeship Program मार्फत उद्योगलाई आवश्यक दक्ष जनशक्ति उत्पादन गर्ने, युवालाई प्रत्यक्ष रोजगारीसँग जोड्ने, श्रम बजारको आवश्यकता अनुरूप सीप विकास गर्ने तथा रोजगार सिर्जनामा निजी क्षेत्रको सक्रिय सहभागिता बढाउने विषयमा छलफल भएको मन्त्रालयले जनाएको छ।

छलफलका क्रममा श्रम मन्त्री यादवले सरकारले अघि बढाएको "आन्तरिक रोजगारी प्रवर्द्धनको दशक" अभियानलाई सफल बनाउन सरकार र निजी क्षेत्रबीचको सहकार्यलाई अझ प्रभावकारी, परिणाममुखी र दिगो बनाउने दिशामा मन्त्रालय प्रतिबद्ध रहेको बताए।

उनले युवालाई स्वदेशमै रोजगारीका अवसर उपलब्ध गराउन निजी क्षेत्रसँगको साझेदारीलाई थप सुदृढ बनाइने र उद्योगको मागअनुसार दक्ष जनशक्ति उत्पादनमा जोड दिइने पनि उल्लेख गरे।