फाल्कन ९ रकेटको निष्क्रिय भाग चन्द्रमामा ठोक्कियो

काठमाण्डौ । अन्तरिक्ष कम्पनी स्पेसएक्सको फाल्कन ९ रकेटको निष्क्रिय माथिल्लो भाग चन्द्रमाको सतहमा ठोक्किएको छ। यद्यपि वैज्ञानिकहरूले यस घटनाको औपचारिक पुष्टि भने अझै गरिसकेका छैनन्।

प्रत्यक्ष रूपमा घटनाको भिडियो वा तस्बिर लिन सक्ने अवस्थामा त्यतिबेला चन्द्रमाको वरिपरि कुनै पनि अन्तरिक्ष यान नरहेकाले वैज्ञानिकहरूले चन्द्र सतहका पुराना र नयाँ तस्बिरहरू तुलना गरेर प्रभावको प्रमाण खोजिरहेका छन्। यसबाट क्रेटर वा सतहमा आएको परिवर्तन पत्ता लगाउने प्रयास भइरहेको छ।

अमेरिकी अन्तरिक्ष एजेन्सी नासाका अनुसार यो घटनाले पृथ्वीमा कुनै खतरा उत्पन्न गर्दैन। वैज्ञानिकहरूका अनुसार यस्तो घटनाले चन्द्रमामा हुने कृत्रिम प्रभावहरूको अध्ययन, अन्तरिक्ष फोहोर व्यवस्थापन तथा भविष्यका चन्द्र अभियानका लागि निगरानी प्रणाली सुधार गर्न सहयोग पुर्याउन सक्छ।

चिलीस्थित परानाल वेधशालाका टेलिस्कोप सञ्चालक रोड्रिगो पालोमिनोसले अनुमानित ठोक्किने समयमा प्रकाश संकेतहरूमा परिवर्तन देखिएको बताएका छन्। उनका अनुसार ती परिवर्तनहरू चन्द्र सतहमा भएको प्रभावपछि निस्किएको धुलो वा पदार्थसँग सम्बन्धित हुन सक्ने प्रारम्भिक संकेत हुन्। तर यसको अन्तिम निष्कर्षका लागि थप वैज्ञानिक विश्लेषण आवश्यक रहेको उनले बताएका छन्।

वैज्ञानिकहरूले अब टक्करबाट बनेको सम्भावित क्रेटर, निस्किएको धुलोको बादल र अन्य प्रभावहरूको अध्ययन गर्नेछन्। यस प्रक्रियाबाट चन्द्रमामा अन्तरिक्ष वस्तु ठोक्किँदा हुने भौतिक परिवर्तनबारे नयाँ जानकारी प्राप्त हुने अपेक्षा गरिएको छ।