लुम्बिनी विकास बैंकको लाभांश क्षमता १६.९९% पुग्यो, नाफा २५२% ले वृद्धि

काठमाण्डौ । लुम्बिनी विकास बैंक लिमिटेडले नाफा तथा व्यवसायमा सुधार गर्दै सेयरधनीहरुका लागि लाभांश दिनसक्ने क्षमता बढाएको छ । बैंकले गत आवको चौथो त्रैमाससम्म आफ्नो वित्तीय अवस्थामा सुधार गर्दै लाभांश क्षमता १६.९९ प्रतिशत पुर्याएको छ ।

अघिल्लो आवको सोही अवधिसम्म भने बैंक सेयरधनीहरुलाई ५.०९ प्रतिशत मात्रै लाभांश दिनसक्ने अवस्थामा थियो । यस्तै बैंकको वितरणयोग्य मुनाफा समेत २३३.८९ प्रतिशतको वृद्धिका साथ ६१ करोड ५८ लाख रुपैयाँ पुगेको छ । अघिल्लो आवमा यस्तो रकम १८ करोड ४३ लाखमा सीमित थियो ।

चौेथो त्रैमाससम्म बैंकले ८५ करोड १० लाख रुपैयाँबराबरको खुद नाफा आर्जन गरेको छ । यो रकम अघिल्लो आवको सोही अवधिको तुलनामा २५२.९६ प्रतिशतले बढी हो । अघिल्लो आवको उक्त अवधिसम्म भने बैंकले २४ करोड ११ लाख रुपैयाँबराबरको खुद नाफा आर्जन गरेको थियो ।

यस्तै बैंकको खुद ब्याज आम्दानी पनि ७.५३ प्रतिशतले बढेर १ अर्ब ९९ करोड पुगेको छ । बैंकको खुद शुल्क तथा कमिशन आम्दानी भने २० करोड ६० लाखबाट घटेर १८ करोड ४२ लाखमा सीमित बन्न पुगेको छ ।

यो अवधिमा सम्भावित नोक्सानीका लागि बैंकले १३ करोड ५० लाख रुपैयाँ इम्पेयरमेन्ट चार्जका लागि छुट्टाएको छ । अघिल्लो आवमा भने बैंकले इम्पेयरमेन्ट चार्जका लागि ७७ करोड ८७ लाख छुट्टाएको थियो ।

यस्तै बैंकको खराब कर्जा अनुपात भने ४.७१८ प्रतिशतबाट बढेर ६.९४ प्रतिशत पुगेको छ । कस्ट अफ फण्ड भने ५.३५ प्रतिशतबाट घटेर ३.९५ प्रतिशतमा सीमित बनेको छ । रिटर्न अन इक्विटी ३.५० प्रतिशतबाट बढेर १०.९९ प्रतिशत पुगेको छ ।

समीक्षा अवधिसम्म बैंकको प्रतिसेयर आम्दानी(ईपीएस) पनि उल्लेख्य बढेको छ । अघिल्लो आवमा ६.५५ प्रतिशतमा सीमित रहेको ईपीएस बढेर २३.४८ रुपैयाँ पुगेको छ । यस्तै बैंकको प्रतिसेयर नेटवर्थ १३.७३ रुपैयाँ, मूल्य आम्दानी अनुपात २०.५८ गुणा र तरलता अनुपात २७.८९ प्रतिशत कायम भएको छ ।