भोटेकोशी बाढीबाट क्षतिग्रस्त विद्युत संरचना पुनःस्थापनामा प्राधिकरणको तीव्रता

काठमाण्डौ । भोटेकोशी नदीमा आएको भीषण बाढीबाट क्षतिग्रस्त विद्युत संरचनाको मर्मत तथा पुनःस्थापना गरी प्रभावित क्षेत्रमा विद्युत आपूर्ति सुचारु गर्न नेपाल विद्युत प्राधिकरणले काम तीव्र बनाएको छ।

बाढीका कारण विद्युत प्रसारण तथा वितरण संरचनामा ठूलो क्षति पुगेपछि प्रभावित क्षेत्रमा विद्युत सेवा नियमित गर्न प्राधिकरणले आवश्यक प्राविधिक जनशक्ति तथा स्रोतसाधन परिचालन गरेको जनाएको छ। विद्युत आपूर्ति सहज बनाउन आवश्यकताअनुसार वैकल्पिक व्यवस्थासमेत अपनाइएको प्राधिकरणको भनाइ छ।

प्राधिकरणका अनुसार बाढीबाट विद्युत संरचनामा उल्लेख्य क्षति पुगे पनि प्रभावित क्षेत्रमा सकेसम्म छिटो विद्युत सेवा पुनःस्थापना गर्ने उद्देश्यले मर्मत तथा पुनर्निर्माणको काम उच्च प्राथमिकताका साथ अघि बढाइएको छ।

प्राधिकरणले उपलब्ध सबै स्रोतसाधन परिचालन गरी विद्युत आपूर्ति नियमित गर्न प्राविधिक टोलीलाई प्रभावित क्षेत्रमा खटाएको जनाएको छ। क्षतिको अवस्था मूल्यांकन गर्दै आवश्यक संरचना मर्मत तथा पुनःस्थापनाको काम चरणबद्ध रूपमा अघि बढाइएको छ।

यसैबीच, ऊर्जा, जलस्रोत तथा सिँचाइ मन्त्रालयले पनि प्रभावित क्षेत्रमा तत्काल विद्युत सेवा उपलब्ध गराउन सौर्य ऊर्जा प्रविधिको प्रयोग गर्ने तयारी गरेको छ। मन्त्रालयले बाढीका कारण नियमित विद्युत आपूर्ति प्रभावित भएका क्षेत्रमा वैकल्पिक रूपमा सौर्य ऊर्जामार्फत विद्युत सेवा पुर्‍याउन आवश्यक संयन्त्र परिचालन गरेको जनाएको छ।

बाढीबाट प्रभावित क्षेत्रमा विद्युत सेवा छिटो पुनःस्थापना गर्न प्राधिकरण र मन्त्रालयले समन्वय गरी वैकल्पिक तथा स्थायी दुवै उपायबाट काम अघि बढाइरहेका छन्।