राधिका शाक्यको आरोप : खरानी ग्याङले सम्मानको अर्थ नबुझ्नु स्वाभाविकै हो

 

काठमाण्डौ । पूर्वप्रधानमन्त्री केपी शर्मा ओलीकी पत्नी राधिका शाक्यले पछिल्लो राजनीतिक घटनाक्रमप्रति कडा असन्तुष्टि जनाउँदै नयाँ सरकारमाथि प्रतिशोधको राजनीति गरेको आरोप लगाएकी छन्।

बालकोटस्थित ओली निवाससँग सम्बन्धित घटनालाई समेटेर तयार पारिएको ‘स्मृतिमा बालकोट घर : सपनाको भग्नावशेष’ स्मृति पुस्तिका सार्वजनिक कार्यक्रममा बोल्दै शाक्यले ‘खरानी ग्याङ’ र ‘टीओबी ग्याङ’ भनेर टिप्पणी गर्दै सरकारको कार्यशैलीमाथि प्रश्न उठाएकी हुन्।

शाक्यले चुनावपछि बनेको सरकारको प्राथमिकता नै केपी शर्मा ओली र तत्कालीन गृहमन्त्री रमेश लेखकलाई पक्राउ गर्नु भएको दाबी गरिन्। नयाँ सरकार गठन भएपछि सुधन गुरुङ गृहमन्त्री नियुक्त भएको खबर सुन्नासाथ आफूले ओली पक्राउ पर्न सक्ने अनुमान गरेको उनले बताइन्।

उनले भनिन्, ‘खरानी ग्याङले सम्मानको अर्थ नबुझ्नु स्वाभाविकै हो। उनीहरूलाई सम्मान भनेको के हो भन्ने सायद थाहा छैन।’

गृहमन्त्री नियुक्तिको प्रसङ्ग जोड्दै उनले आफूले त्यही दिनदेखि घटनाक्रमप्रति आशङ्का व्यक्त गरेको बताइन्।

‘दिउँसो सुधन गुरुङ गृहमन्त्रीमा नियुक्त भयो रे भन्ने सुन्नासाथ मैले अब तुरुन्तै केपी सरलाई गिरफ्तार गर्छन् भन्ने शंका गरेको थिएँ,’ उनले भनिन्।

शाक्यका अनुसार त्यसपछि रातिको समयमा ठूलो संख्यामा सुरक्षाकर्मी परिचालन गरी बालकोट क्षेत्र घेराबन्दी गरिएको थियो। उनले पूरै क्षेत्र नियन्त्रणमा लिएर ओली र लेखकलाई पक्राउ गरिएको दाबीसमेत गरिन्।

उक्त घटनालाई उनले कानुनी प्रक्रियाभन्दा पनि राजनीतिक प्रतिशोधको परिणामका रूपमा व्याख्या गरिन्।

शाक्यले ओली निवासमा खानतलासी हुने हल्ला फैलाइएको र त्यसका कारण परिवारका सदस्य तथा स्थानीयवासीमा समेत त्रासको वातावरण बनेको आरोप लगाइन्।

उनको भनाइमा, राजनीतिक असहमति वा सरकार परिवर्तनलाई व्यक्तिगत प्रतिशोधमा रूपान्तरण गर्नु लोकतान्त्रिक संस्कारअनुकूल हुँदैन।

यद्यपि शाक्यले लगाएका यी आरोपबारे सम्बन्धित सरकारी निकाय वा आरोपित पक्षको प्रतिक्रिया सार्वजनिक भएको विवरण उक्त कार्यक्रममा प्रस्तुत गरिएको थिएन।