आगामी सिजनका लागि रासायनिक मल खरिद गर्न १० अर्बको स्रोत सहमति

 

काठमाण्डौ । आगामी सिजनमा किसानलाई आवश्यक पर्ने रासायनिक मलको सहज आपूर्ति सुनिश्चित गर्न सरकारले खरिद प्रक्रिया अघि बढाउने तयारी गरेको छ।

कृषि, वन तथा पर्यावरण मन्त्री गिता चौधरीको पहलमा आगामी सिजनका लागि आवश्यक रासायनिक मल खरिद गर्न अर्थ मन्त्रालयबाट १० अर्ब रुपैयाँ बराबरको स्रोत सहमति प्राप्त भएको हो।

स्रोत सहमति प्राप्त भएसँगै उक्त रकमबाट आवश्यक परिमाणको रासायनिक मल खरिदका लागि टेन्डर आह्वान गर्ने प्रक्रिया अघि बढाइने तयारी गरिएको छ।

मन्त्री चौधरीले खेतीको मुख्य सिजनमा किसानले मल अभाव व्यहोर्न नपरोस् भन्ने उद्देश्यले समयमै खरिद प्रक्रिया पूरा गर्न र आपूर्ति व्यवस्थापनलाई प्रभावकारी बनाउन सम्बन्धित निकायलाई निर्देशन दिएकी छन्।

उनले रासायनिक मलको व्यवस्थापनलाई प्राथमिकताका साथ अघि बढाउँदै आपूर्ति प्रणालीमा ढिलाइ हुन नदिन आवश्यक तयारी गर्नसमेत निर्देशन दिएको मन्त्रालयले जनाएको छ।

सरकारले खरिद प्रक्रिया समयमै अघि बढाएर आगामी सिजनमा किसानलाई आवश्यक मल सहज रूपमा उपलब्ध गराउने लक्ष्य लिएको छ।