एनआरएनएसँग प्रचण्डको प्रतिबद्धता– वंशजको नागरिकताको विषयमा सकारात्मक छु, नीतिगत पहल गर्छु

NEWS
सोमबार, आश्विन १२,२०८३ 18:12:59

काठमाण्डौ । गैरआवासीय नेपाली संघ (एनआरएनए) को प्रतिनिधिमण्डल र नेपाल कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’बीच भेटवार्ता भएको छ ।

एनआरएनएका महासचिव डा. चिरञ्जीवी खड्काको नेतृत्वमा गएको प्रतिनिधिमण्डलले सोमबार प्रचण्डसँग भेट गरी गैरआवासीय नेपालीसँग सम्बन्धित विभिन्न विषयमा छलफल गरेको हो ।

भेटका क्रममा एनआरएनए प्रतिनिधिमण्डलले बाढी प्रभावित क्षेत्रमा संघका तर्फबाट हालसम्म गरिएको राहत तथा उद्धार कार्यबारे जानकारी गराएको थियो । आगामी दिनमा पनि सहयोगलाई निरन्तरता दिने प्रतिबद्धता प्रतिनिधिमण्डलले जनाएको छ ।

प्रचण्डले विपद् तथा संकटका बेला गैरआवासीय नेपाली समुदायले पुर्‍याउँदै आएको मानवीय सहयोगको प्रशंसा गरेका छन् ।

भेटमा विदेशमा बसोबास गर्ने नेपालीका लागि वंशजको नागरिकताको निरन्तरताको विषय पनि उठाइएको थियो ।

एनआरएनए प्रतिनिधिहरूले नेपाली मूलका नागरिकको पहिचान, आर्थिक तथा सामाजिक सम्बन्धलाई निरन्तरता दिन वंशजको नागरिकताको व्यवस्था महत्वपूर्ण रहेको बताएका थिए ।

जवाफमा प्रचण्डले आफू गैरआवासीय नेपालीका लागि वंशजको नागरिकताको विषयमा सुरुवाती दिनदेखि नै सकारात्मक रहेको बताएका छन् ।

उनले राजनीतिक अधिकारबाहेक आर्थिक, सामाजिक तथा सांस्कृतिक अधिकार सुनिश्चित गर्ने गरी आवश्यक व्यवस्था गर्न सकिने विषयमा आफू स्पष्ट रहेको उल्लेख गरे ।

प्रचण्डले नेपाली मूलका नागरिकको पहिचानलाई कायम राख्न आवश्यक नीतिगत पहल गर्ने आश्वासनसमेत दिएका छन् ।

विदेशमा रहेका नेपालीको सीप, पुँजी र प्रविधि नेपालमा भित्र्याउन नागरिकताको निरन्तरताले थप सहज वातावरण बनाउने उनको भनाइ थियो ।

यस विषयलाई अन्य राजनीतिक दलसँग पनि संवाद गरेर निष्कर्षमा पुर्‍याउन पहल गर्ने प्रचण्डले एनआरएनए प्रतिनिधिमण्डललाई बताएका छन् ।

भेटमा एनआरएनएले गैरआवासीय नेपालीको दीर्घकालीन पहिचान, लगानी र मातृभूमिसँगको सम्बन्धलाई संस्थागत गर्न नागरिकतासम्बन्धी नीतिगत स्पष्टता आवश्यक रहेको धारणा राखेको थियो ।