दशैं–तिहार र छठमा वालेट लोड गर्ने सीमा पाँच गुणा बढ्यो

काठमाण्डौ ।  नेपाल राष्ट्र बैंकले ठूला चाडपर्वलाई लक्षित गर्दै डिजिटल भुक्तानीलाई थप सहज बनाएको छ। केन्द्रीय बैंकले भुक्तानी प्रणालीसम्बन्धी एकीकृत निर्देशन संशोधन गरी दशैं, तिहार र छठको अवधिमा व्यक्तिगत वालेटमा रकम जम्मा गर्न सकिने दैनिक पटक संख्या बढाएको हो।

नयाँ व्यवस्थाअनुसार प्राकृतिक व्यक्तिले तोकिएको चाडपर्व अवधिमा एक दिनमै ५० पटकसम्म वालेटमा रकम लोड गर्न सक्नेछन्। यसअघि यस्तो सीमा दैनिक १० पटकसम्म मात्र थियो।

राष्ट्र बैंकले यो विशेष सुविधा असोज ३१ गतेदेखि कात्तिक ८ गतेसम्म तथा कात्तिक २१ गतेदेखि कात्तिक २९ गतेसम्म लागू हुने व्यवस्था गरेको छ। यससँगै चाडपर्वका बेला डिजिटल भुक्तानीको बढ्दो चाप व्यवस्थापन गर्न र प्रयोगकर्तालाई बढी लचिलो सुविधा दिन खोजिएको देखिन्छ।

केन्द्रीय बैंकले पछिल्लो समय नगद कारोबार घटाउँदै डिजिटल माध्यमको प्रयोग विस्तार गर्ने नीतिलाई प्राथमिकता दिँदै आएको छ। दशैं, तिहार र छठका अवसरमा दक्षिणा तथा अन्य भुक्तानीसमेत डिजिटल माध्यमबाट गर्न राष्ट्र बैंकले आग्रह गर्दै आएको छ।

वालेटमा रकम जम्मा गर्ने सीमा पाँच गुणाले बढाइएसँगै चाडपर्वका बेला डिजिटल कारोबार थप सहज हुने अपेक्षा गरिएको छ। विशेषगरी किनमेल, दक्षिणा, सेवा भुक्तानी तथा साना–ठूला दैनिक कारोबारमा वालेटको प्रयोग बढ्ने सम्भावना देखिएको छ।