तीन हजारको बिलमा १० लाखको बम्पर, करदाता उपहारमा १७ उपभोक्ता विजेता

काठमाडौं । तीन हजार रुपैयाँको खरिद बिल प्रविष्टि गरेका एक उपभोक्ताले करदाता प्रोत्साहन उपहार कार्यक्रमअन्तर्गत १० लाख रुपैयाँको बम्पर पुरस्कार जितेका छन्। असोज महिनाको दोस्रो पाक्षिकको नतिजाअनुसार एसएस फेन्सी हाउसबाट खरिद गरिएको उक्त बिलसँग सम्बन्धित कुपन बम्पर विजेता बनेको हो।

असोज १६ गतेदेखि मसान्तसम्मको अवधिका लागि सञ्चालन गरिएको कार्यक्रममा बम्परसहित १७ जना उपभोक्ता विजेता घोषित भएका छन्। बाँकी १६ जनाले दैनिक पुरस्कारतर्फ जनही एक लाख ३३ हजार ३३४ रुपैयाँ जितेका छन्।

काठमाडौंको न्यूरोडस्थित विशाल बजार परिसरमा आयोजित कार्यक्रममा वरिष्ठ कलाकार तथा निर्माता दीपकराज गिरी र दीपाश्री निरौलाले संयुक्त रूपमा विजेता छनोट तथा घोषणा गरेका हुन्। कार्यक्रमको कार्यविधिअनुसार विजेता चयन गरिएको जनाइएको छ।

बम्पर पुरस्कार जित्ने कुपन नम्बर ‘०८१ ६३२ ५१५ ८४९’ रहेको छ। सार्वजनिक नतिजामा उक्त कुपनसँग सम्बन्धित कारोबार एसएस फेन्सी हाउसमा भएको र बिल रकम तीन हजार रुपैयाँ रहेको उल्लेख छ।

दैनिक पुरस्कारतर्फ विजेता बनेका कुपनहरू अरोमा क्याफे एन्ड रेस्टुरेन्ट, सन्ध्या चाइनिज स्किन केयर, घरेलु मिट मार्ट, भाटभटेनी, मेटलाइफ, शेर्पा आउटडोर, अब्दुल रहमान सिरक डसना ट्रेडर्स र तन्दुरी दरबारसँग सम्बन्धित कारोबारका छन्।

त्यस्तै, ओम ढाका एन्ड भेराइटी सेन्टर, एस राज ट्रेडर्स, ओशो मार्ट, मेट्रो मार्केट, हिताङ फेन्सी स्टोर्स, विकास जनरल स्टोर्स, अर्घाखाँची मासु पसल र न्यू सुलभ एन्ड कोल्ड स्टोर्सबाट भएका कारोबारका कुपन पनि दैनिक पुरस्कारका लागि छनोट भएका छन्।

सार्वजनिक गरिएको सूचीमा विजेताको व्यक्तिगत नामको सट्टा कुपन नम्बर, आंशिक रूपमा लुकाइएको मोबाइल नम्बर, कारोबार भएको व्यवसाय र बिल रकम उल्लेख गरिएको छ। यसअनुसार सहभागी उपभोक्ताले आफ्नो कुपन नम्बर विजेता सूचीसँग मिलाएर नतिजा पहिचान गर्न सक्छन्।

वस्तु तथा सेवा खरिद गर्दा बिल लिने र त्यसको विवरण प्रविष्टि गर्ने अभ्यासलाई प्रोत्साहन गर्न सञ्चालित यस कार्यक्रमको पछिल्लो नतिजामा रेस्टुरेन्ट, खुद्रा पसल, मासु पसलदेखि बीमासम्मका कारोबार समेटिएका छन्।