एप्पलद्वारा प्रयोगकर्ताको ७ बिलियन डलर ठगी हुनबाट बचाएको दाबी,१७ लाख एप्स रिजेक्ट

FIN-TECH
सोमबार, जेष्ठ ७,२०८१ 09:42:05

काठमाण्डौ । आईफोन निर्माता कम्पनी एप्पलले आफ्ना प्रयोगकर्ताहरुको ७ बिलियन डलर ठगी हुनबाट बचाएको जनाएको छ । कम्पनीले ‘चौथो वार्षिक ठगी रोकथाम विष्लेशण’ सार्वजनिक गर्दै सन् २०२० देखि २०२३ को बीचमा साइबर ठगी कारोबारलाई रोकेर प्रयोगकर्ताहरुको ७ बिलियन डलर जोगाएको जनाएको हो ।

यसमा सन् २०२३ मा मात्रै कम्पनीले १.८ बिलियन डलर ठगी हुनबाट रोकेको दाबी गरेको छ । कम्पनीले अहिलेसम्म चोरी भएका १४ मिलियन क्रेडिट कार्ड ब्लक गरिसकेको र यी कार्ड प्रयोग गर्ने ३.३ मिलियन अकाउन्ट रोक्का गरिएको जनाएको छ ।

कम्पनीले सन् २०२३ मा मात्रै ३.५ मिलियन चोरीको क्रेडिट कार्डबाट हुने फर्जी सपिङ रोकेको उल्लेख गरेको छ । यो अवधिमा कम्पनीले चोरी गरेको कार्डबाट खरिद गर्ने प्रयास गर्ने १.१ मिलियन यस्ता अकाउन्टमा प्रतिबन्ध लगाएको छ ।

एप्पलको वार्षिक प्रतिवेदनका अनुसार कम्पनीको नियमले प्रयोगकर्तालाई ठगी गर्ने एप्सहरुबाट बचाउने गर्छ । कम्पनीले सन् २०२३ मा १.७ मिलियन भन्दा बढी ऐपको सब्मिसनलाई रिजेक्ट गरेको जनाएको छ । ती एपहरुले एप्पल एप्प स्टोरको मापदण्ड पुरा नगरेकाले ती एपहरुलाई अस्विकार गरिएको एप्पलले उल्लेख गरेको छ ।

यस्तै एप्पलले सन् २०२३ मा करिब ३७४ मिलियन डेभलपर्स एण्ड कस्टमर अकाउन्टलाई टर्मिनेट गरेको छ । कम्पनीले यसबीचमा १ लाख १८ हजार डेभलपर्स अकान्टलाई ठगीवाला एप बनाउन नसकोस् भन्ने उदेश्यले ब्लक गरेको छ । -एजेन्सी