लचक मौद्रिक नीति आउने राष्ट्र बैंकको संकेत, तरलता अझै सहज बनाइने

NEPAL RASTRA BANK
बिहीबार, जेष्ठ १७,२०८१ 16:49:07

काठमाण्डौ । सेयर बजार आशा नै आशाको खेति हुने ठाउँ हो । यहाँ लागानीकर्ताहरुले भविष्यको सम्भावनालाई मध्यनजर गरेर लगानी गरेका हुन्छन् । सेयर बजारलाई बिभिन्न तत्वहरुले प्रभाव पार्ने गर्छ । सरकारको नीति तथा राष्ट्र बैंकको म्रौद्रिक नीतिले बजारलाई ठूलै प्रभाव पार्छ । त्यहि कारण लगानीकर्ताहरले बजेट र मौद्रिक नीतिलाई निकै चासोका साथ हेरेका हुन्छन् ।

लगानीकर्ताहरुले अपेक्षा गरे जस्तो बजेट नआएपछि अहिले सेयर बजार लगातार २ दिन घटेको छ । बजेटबाट सेयर बजारको विषयमा केहि नयाँ कुरा नआएपछि अब लगानीकर्ताहरुको ध्यान राष्ट्र बैंकको मौद्रिक नीति तर्फ मोडिएको छ । यस्तोमा नेपाल राष्ट्र बैंकका डेपुटी गभर्नर बम बहादुर मिश्रले आगामी मौद्रिक नीति बजारलाई चलायमान बनाउने गरि लचक हुने संकेत दिएका छन् । आज नाफिजले काठमाडौंमा आयोजना गरेको आगामी आर्थिक वर्ष २०८१/८२ को बजेटमाथिको छलफल कार्यक्रममा मिश्रले वित्तीय क्षेत्रको सुधार गर्दै घर जग्गालाई डिजिटलाइजेसन गरिने बताए । कार्यक्रममा नेपाल राष्ट्र बैंकका डेपुटी गभर्नर बमबहादुर मिश्रले बजेटमा वित्तीय क्षेत्र सुधार गर्ने कार्यक्रम आउनु निकै महत्वपूर्ण भएको बताए । उक्त कार्यक्रम कार्यान्वयनको नेतृत्व गर्न राष्ट्र बैंक तयार रहेको पनि उनले बताए । ‘बजेट यस्तो नीति आउनु एकदमै स्वागतयोग्य छ,’ उनले भने, ‘यसको नेतृत्व लिने राष्ट्र बैंकले नै हो । त्यसका लागि हामी तयार नै छौं ।’उनले भने ।

यस्तै, उनले बजेटले सरकार र राष्ट्र बैंकका कामबीच तादम्यता मिलाएको पनि बताए । यसले बजेट कार्यान्वयनमा सहजता प्रदान गर्ने उनले बताए ।

यसैगरि डिजिटल भुक्तानीको प्रवद्र्धन, केन्द्रीय बैंक डिजिटल करेन्सी, ग्रीन फाइनान्स ट्याक्सोनोमी लगायत विषयलाई बजेटमा समावेश गर्दै वित्तीय क्षेत्र सुधार गर्ने बजेटको घोषणाले राष्ट्र बैंकको कार्यक्रमलाई थप सहयोग पुग्ने उनले बताए ।

यस्तै, उनले कृषिमा आवश्यक पर्ने लगानीलाई केन्द्रीय बैंकले कम हुन नदिने प्रतिवद्धता गरे । यसैगरि घर कर्जाको कारोबार तथा फुकुवा, कर सम्बन्धी काम, मालपोत लगायतका बीचमा डिजिटल प्लेटफर्म बनाइ बैंकको माध्यमबाट काम गर्ने नीति आउनु पनि राम्रो पक्ष भएको डेपुटी गभर्नर मिश्रको भनाइ छ ।

मिश्रले बजेटमा घोषणा गरेअनुसार सहुलियतपूर्ण कर्जाको नीतिलाई पुनरसंरचना गरिने पनि उनले बताए । यसका लागि छुट्टै कमिटी नै बनाएर काम गरिने उनको भनाइ छ । आगामी दिनमा आवश्यक पुनरसंरचना गरि यसलाई थप प्रभावकारी बनाउने उनले बताए ।

यस्तै, उनले ६ प्रतिशतको आर्थिक वृद्धि, ५.५ प्रतिशतमा मूद्रास्फीति सिमित राख्ने र १२ प्रतिशत प्रतिशतको कर्जा बृद्धि गर्ने लक्ष्य पुरा हुने पनि उनले बताए । चालु आवको मौद्रिक नीतिको तेस्रो त्रैमासिक समिक्षामार्फत बैंकहरुलाई पुँजी पर्याप्ततामा सहजीकरण गरिसकेको हुदाँ यो लक्ष्य प्राप्ती गर्न सहज हुने उनले बताए । समग्रमा यसअघि नै केन्द्रीय बैंक त्यसतर्फ अगाडि बढि सकेको उनले बताए । साथै, आर्थिक गतिविधि चलायमान बनाउने गरि आगामी आवको मौद्रिक नीति बनाउने तयारी भइरहेको पनि उनले बताए ।

‘निजी क्षेत्रले लचक मौद्रिक नीति आवश्यक रहेको बताएको छ । मौद्रिक नीति त अहिले पनि लचक नै छ । व्याजदर पनि धेरै कम भइसकेको छ,’ उनले भने, ‘यद्यपि, अर्थतन्त्र चलायमान बनाउन आगामी आवको मौद्रिक नीतिबाट के कस्तो व्यवस्था गर्न सकिन्छ । त्यसमा हामी सकरात्मक छौं ।’