.gif)
_(1).gif)
.png)
काठमाण्डौ । नेपाली कांग्रेसका एक केन्द्रीय सदस्यले एमालेसँगको छलफल निकै सकारात्मक बनेको र केही घण्टामै त्यो परिपक्व हुने दाबी गरेका छन् ।
नाम उल्लेख नगर्ने शर्तमा देउवा निकट ती कांग्रेस नेताले बिजशालासँग भने–‘छलफलहरु निकै सकारात्मक बनेका छन् । तपाईलाई भनिदिन्छु, केही घण्टाभित्रै सबै कुरा परिपक्व हुनेवाला छ । बाहिर जेसुकै हल्ला होस्, अब सत्ता गठबन्धन फेरिन प्रष्ट भइसकेको छ ।’
.gif)
ती नेताले दाबी गर्दै अहिले कांग्रेस र एमालेका उच्च तहका नेताहरु सत्ता सहकार्यदेखि संविधान संसोधनसम्मको मुद्दामा सहमतिनजिक पुगिसकेका र सहमतिको खाका नै लेख्न थालिसकिएको बताए । ‘मैले बुझेअनुसार अहिले सहमतिको ड्राफ्ट नै तयार हुन थालिसकेको छ । केही घण्टाको प्रतिक्षापछि देशले गुड न्यूज पाउने पक्का भयो ।’ ती नेताले थपे ।
नेपाली कांग्रेसका सभापति शेरबहादुर देउवाले आजै पदाधिकारी बैठक समेत बोलाएका थिए । सो क्रममा उनले समेत एमाले अध्यक्ष केपी ओलीसँगको छलफल निकै सकारात्मक रहेको बताएका थिए ।
उता, नेकपा एमालेका अध्यक्ष ओली चाहिँ च्यासलस्थित पार्टी कार्यालयमा ईश्वर पोखरेल, शंकर पोखरेल, राजन भट्टराई लगायतका ९ पदाधिकारी तहका नेताहरुसँग ढोका थुनेर छलफल गरिरहेका छन् । सो छलफलमा कांग्रेसका एक नेताले भनेजस्तै कांग्रेससँग सत्ता सहकार्यदेखि संविधान संसोधन लगायतका मुद्दाहरुमा सहकार्य गर्ने हिसाबले सहमतिको सम्भावित खाकाको विषयमा कुराकानी भइरहने हुनसक्ने अनुमान गर्न सकिन्छ ।
‘संविधान संशोधन गरी निर्वाचन प्रणाली फेर्ने र स्थिर सरकार दिने शर्तमा दुई दल बैकल्पिक गठबन्धन निर्माणको अन्तिम चरणमा पुगेका छन् ।’ एमालेस्थित एक उच्च स्रोतले भन्यो–‘तेश्रो शक्ति भएर सत्तामा हालीमुहाली गर्ने माओवादीका दिन अब सकिए ।’
एमाले र काँग्रेसबीच नयाँ सत्ता समीकरणको प्रक्रिया अघि बढेको खबर बाहिरिएसँगै एमाले अध्यक्ष ओलीको सक्रियता ह्वात्तै बढेको छ । उनले आज बिहान प्रधानमन्त्री पुष्पकमल दाहाल(प्रचण्ड)सँग बालुवाटारमा तीनघण्टा वार्ता गरेका थिए । सो वार्तालाई स्वभाविक भनिए पनि त्यहाँ ओलीले आफ्नो नेतृत्वमा राष्ट्रिय सहमतिको सरकार बनाउन कांग्रेस समेत सहमत भएकोले सहयोग गर्न प्रचण्डलाई आग्रह गरेका बुझिएको छ । प्रचण्डले भने कांग्रेससँग सहकार्य गर्न नहुने, बरु अहिलेको गठबन्धन जोगिन्छ भने आफूले प्रधानमन्त्रीको पद त्याग्नेसम्मको वचन दिएका बुझिएको छ ।
.png)
.jpg)
.gif)
.gif)
.gif)
