उच्च हवाई भाडा लिएको गुनासोप्रति हिमालयन एयरलाइन्सको गम्भीर ध्यानाकर्षण, कालोबजारी गरेका भेटिए कारवाहीको चेतावनी

काठमाण्डौ । हिमालयन एयरलाइन्सले अन्तर्राष्ट्रिय गन्तव्यसम्मको उडानमा उच्चहवाई भाडा लिएको भनि आएको जनगुनासोप्रति गम्भीर ध्यानाकर्षण भएको जनाएको छ ।  

कम्पनीले त्रिभुवन अन्तर्राष्ट्रिय विमानस्थल १० घण्टा बन्द हुने कारण देखाउँदै काठमाण्डौबाट विभिन्न अन्तर्राष्ट्रिय गन्तव्यसम्मको उडानमा उच्चहवाई भाडा लिएको भनि आएको जनगुनासोप्रति हिमालय एअरलाइन्स्को गम्भीर ध्यानाकर्षण भएको जनाएको हो । कम्पनीले हवाई टिकटको कालोबजारी नियन्त्रण गर्न तथा विदेश यात्रा गर्ने सर्वसाधारणका लागि उचित भाडा उपलब्ध गराउन आफ्नो सिट क्षमताको परिधिमा रहेर भाडा दर कायम गरेको स्पष्ट पारेको छ ।

कालोबजारी नियन्त्रणका लागि कम्पनीले विभिन्न उपाय अपनाइएको जनाएको छ ।  

संस्कृति, पर्यटन तथा नागरिक उड्डयन मन्त्रालयको निर्देशन र नेपालमा सञ्चालनमा रहेका सबै अन्तर्राष्ट्रिय एअरलाइन्स्को सहमतिमा १० नोभेम्बर २०२४ देखि अर्को सूचना जारी नहुन्जेलसम्म सबै ग्रुप टीबीए(प्रि–पर्चेज) बुकिङ निलम्बन गरि सकेको कम्पनीले जनाएको छ ।

यस्तै कम्पनीले सबै ट्राभल एजेन्टहरूलाई न्यूनतम लाभ मार्जिनमा मात्र टिकट बिक्री गर्न सूचित गरि सकिएको साथै ट्राभल एजेन्टहरूलाई हप्तामा कम्तीमा दुई पटक ईमेल पठाइरहेको उल्लेख गरेको छ । यदि कसैले कालोबजारी गरिएको भेटिएमा नेपालको सम्बन्धित कानूनअनुसार कारबाही गरिने चेतावनी कम्पनीले दिएको छ ।

वाई क्लास भाडा नर्मल इकोनमिक्लासकोे उच्चतम श्रेणीको भाडादर भएको र यात्रुहरूलाई सहज बनाउन हिमालय एअरलाइन्स्ले २१ नोभेम्बर २०२४ देखि सो उच्चतम श्रेणीको भाडादरमा टिकट बिक्री नगर्ने निर्णय गरेको छ ।  

यसैगरि, यात्रुहरूले आफूसँग अत्याधिक भाडादर लिइएको भन्ने भएमा कम्पनीलाई सम्पर्क गर्न आग्रह गरिएको छ ।