ग्राउण्ड जिरोका लगानीकर्ता भन्छन्, ‘कर्णाली बैंकमा डुब्यौं, भगवान भनिएका अर्थमन्त्रीले पनि समस्या सुनेनन्’

काठमाण्डौ । सधैंको साता जस्तै आज पनि हामीले विभिन्न ब्रोकर हाउसमा पुगेर लगानीकर्ताहरुको बिचार सुन्ने र बुझ्ने कार्यलाई निरन्तरता दिएका छौं । यसै सिलसिलामा आज हामी बानेश्वर र अनामनगर आसपासका केही नयाँ तथा पुराना ब्रोकर हाउसहरुमा पुगेका थियौं ।  

आज राजधानीको मौसम दिनभर बदलिएका कारण मौसम चिसिएको थियो भने बजार पनि दिनभर सामान्य अंकले तल माथि गर्दै थियो । केही समयदेखि साइडवेज चलेको बजारमा लगानीकर्ताहरुमा पनि खासै उत्साह देखिदैनथ्यो ।  

आज हामीे सबै भन्दा पहिले ज्ञानेश्वरमा रहेको नागरिक स्टक डिलर (ब्रोकर नम्बर ६०) मा गाएका थियौंं । यस ब्रोकरमा पनि लगानीकर्ताको उपस्थिति खासै राम्रो थिएन । आज बिहानैदेखि बजारले खासै गति लिन सकेको थिएन ।  

यसै विषयलाई जोडेर एक लगानीकर्ता भने ‘आज पनि बजारले गति लिने छाँट देखाएन । मैले त पुसको लागि सेयर नबेचि भएको छैन । ती लगानीकर्ताको बोलि भुइँमा खस्न नपाउँदै उनी सँगै बसेकि एक महिला लगानीकर्ताले भनिन् ‘मैले एउटा बैंकमा फोन सम्पर्क गरेको माघ महिनाबाट ब्याज बढ्ने संकेत दिएको छ । एफडीमा ब्याज बढ्ला जस्तो देखिन्छ ।’ त्यसो भए त, सेयर बजार ब्याज घट्दा पनि घट्ने बढ्दा पनि घट्ने भयो,’ सँगैका एक पुरुष लगानीकर्ताले भने ।  

यसै ब्रोकरमा केही महिला लगानीकर्ताले नेपाल फाइनान्समा नराम्ररी डुबेको भन्दै पिडा पोखेको पनि सुनियो । ब्रोकर हाउसमा यस्तै गल्फति चल्दै थिए । यहाँबाट हामी बुद्धनगरस्थित कलश सेक्यूरिटिज (स्टक ब्रोकर नम्बर ७४) मा पुग्यौं । यस बेलासम्म दिनको १२ बजिसकेको थियो । यहाँ पनि लगानीकर्ताको उपस्थिति खासै थिएन । २ जना लगानीकर्ता घाम ताप्दै ३२ सयको इन्डेक्समा पैसा कमाएको कथा सुनाँउदै थिए ।  

ती मध्येका एकले भने ‘मेरो एक जना साथिले ३२ सयको इन्डेक्समा १२ करोड पैसा त बनायो तर बजारबाट लान भने सकेन । अर्का लगानीकर्ताले सोधे, ‘कसरी नि ? उनको प्रश्नको जवाफ दिदै ती लगानीकर्ताले भने, ‘एक दुई स्क्रिप्टमा पैसा त बनाएको हो । तर उसले पैसा ब्रोकरबाट झिकेन । पछि फेरि २४ सयमा ब्रोकरकै सल्लाहमा सेयर किन्यो । बजार १८ सय आउदा जस्ताको तस्तै । १२ करोडको फाइदालाई २० करोड बनाउने लोभले आएको नाफा पनि गयो । तर एउटा गाडी किन्ने पैसा भने झिक्यो रे । यो बजार पनि यस्तै नै रहेछ । कमायो, कमायो अन्त्यमा सेयर बजारमा नै सकिन्छ ।  

ब्रोकर हाउसमा यस्तै गल्फति चल्दै थिए । हामी भने अनामनगरमा रहेको म्याग्नेट सेक्यूरिटिज (स्टक ब्रोकर नम्बर ९५) मा पुग्यौं । यहाँ पनि लगानीकर्ताको खासै उपस्थिति थिएन । हामीले केही समय ब्रोकर सञ्चालकसँग पनि कुरा गर्यो । यहाँ भेटिएका ब्रोकर सञ्चालकले बजार अब धेरै नघट्ने विश्वास व्यक्त गरे ।

यहाँबाट हामी अनामनगरमा नै रहेको कालिका सेक्यूरिटिज (स्टक ब्रोकर नम्बर ४६) तर्फ लाग्यौं । यसबेला सम्म दिनको १ बजिसकेको थियो । बजारमा ५ अंक जतिको सुधार आएको थियो । यसै ब्रोकरमा भेटिएका एक लगानीकर्ताले प्राविधिक बिश्लेषकहरुले भने अनुसार यदि नेपालको बजारमा धर्काले काम गर्छ भने अब बजार तल नजाने बताए । केही समयको बसाईपछि हामी बानेश्वरमा रहेको नेपाल सेयरधनी संघको कार्यलयमा गयौं ।  

यहाँ पनि केही लगानीकर्ता निराश भएर हाइ काढ्दै बसेका भेटिए । यहाँ भेटिएका एक लगानीकर्ताले निराश हुँदै भने ‘हेर्नुहोस साथीहरु अब गभर्नर जाँदै गर्दा माघको पहिलो साता केही होला कि ? नयाँ गभर्नर आउँदा बजारले लय लिन्छ जस्तो लाग्छ मलाइ त ।’ उनले थप्दै भने, ‘यी गभर्नरले लगानीको वातावरण बनाउनै सकेनन् ।’

उनले थप थप्दै भने ‘ हामी कर्णाली विकास बैंकमा राम्रै सँगै डुब्यौं । भगवान भनिएका अर्थमन्त्री विष्णु पौडेलले पनि लगानीकर्ताको समस्या सुनेनन् । कणाली विकास बैंक आठ सयमा किनेका लगानीकर्ता अहिले कसरी बाँचेका होलान् ? कहिले कारोबार खुल्ने होला ? बैंकमा धितो राख्नेको अवस्था के भएको होला ?  

यस ब्रोकरमा भेटिएका एक लगानीकर्ताले आफ्नो पीडा सुनाउँदै भने, ‘हामीले भगवान मानेका अर्थमन्त्रीेले कारोबार खोलेर सहज गरिदिनु पर्यो ।’