हिमालयन लाइफका कर्मचारीको बोनस झण्डै दोब्बरले वृद्धि, तलब वितरणमा १६ करोड खर्च

काठमाण्डौ । हिमालयन लाइफ इन्स्योरेन्स कम्पनीले कर्मचारीको बोनस ८९.२२ प्रतिशतले बढाएको छ । कम्पनीले आव २०७९/८० का लागि कर्मचारीलाई बाँड्ने बोनस झण्डै दोब्बरले बढाएको हो ।  

उक्त आवमा कम्पनीले कर्मचारीलाई ७ करोड ७० लाख ७३ हजार रुपैयाँ बोनस वितरण गरेको छ । कम्पनीले आव २०७८/७९ मा भने कर्मचारीलाई ४ करोड ७ लाख ३३ हजार रुपैयाँ बोनस बाँडेको थियो ।  

त्यस्तै, यता कर्मचारीको तलब पनि २६.४३ प्रतिशत बृद्धि गरिएको छ । उक्त आवमा कम्पनीले कर्मचारीलाई १६ करोड ९ लाख रुपैयाँ तलब वितरण गरेको छ।  यो रकम अघिल्लो आवको तुलनामा २६ प्रतिशत बढी हो । आव २०७८÷७९ मा कम्पनीले १२ करोड ७३ लाख रुपैयाँ तलब बाँडेको थियो ।  

कर्मचारीले पाउने भत्ता शिर्षकमा भने कम्पनीले ८ करोड ९६ लाख रुपैयाँ छुट्याएको छ । यो रकम पनि आव २०७८/७९ को तुलनामा १८.२० प्रतिशत बढी हो । उक्त आवमा कम्पनीले तलब भत्ता शिर्षकमा ७ करोड ५७ लाख रुपैयाँ छुट्याएको थियो ।  

यसका साथै, कम्पनीले चाडपर्व भत्ताका लागि १ करोड ४२ लाख, ग्रेज्युटी शिर्षकमा १ करोड ५५ लाख, अन्य शिर्षकमा १९ लाख, सामाजिक सुरक्षा कोषका लागि १ करोड ५३ लाख, विदा भत्ता वापत ३ करोड ९८ लाख, युनिफर्मका लागि २५ लाख, तालिमका लागि ४६ लाख ८० हजार, कर्मचारीको बीमा सुविधा वापत ८३ लाख २९ हजार, कर्मचारी विदाइमा १३ लाख ७० हजार र ओभर टाइम काम गरेवापत १ लाख ८२ हजार रुपैयाँ खर्च गरेको छ ।  

त्यस्तै, कर्मचारीको फर्ममेन्समा १६ लाख ६६ हजार, भीआरएस सुविधावापत १७ करोड ३३ लाख रुपैयाँ खर्च गरेको छ । यसरी कम्पनीले उक्त आवमा कर्मचारी सुविधाका लागि कुल ६० करोड ६८ लाख ७७ हजार रुपैयाँ खर्च गरेको छ ।  

यो रकम गत आवको तुलनामा ९१.६३ प्रतिशत बढी हो । आव २०७८/७९ मा कम्पनीले कर्मचारी सेवा सुविधाका लागि ३१ करोड ६६ लाख रुपैयाँ छुट्याएको थियो ।