जीवन बीमकहरुको कुल व्यवसायको ९% रकम सरेण्डर, एलआइसी नेपालको व्यवसाय धराप हुँदै

काठमाण्डौ । जीवन बीमा कम्पनीहरुबाट साढे ८ अर्ब रुपैयाँ बाहिरिएको छ । नेपाल बीमा प्राधिकरणले उपलब्ध गराएको तथ्याङ्कअनुसार चालु आवको ७ महिनासम्ममा जीवन बीमा कम्पनीबाट ८ अर्ब ५९ करोड रुपैयाँ बराबरको बीमा पोलिसी सरेण्डर भएको छ ।  

प्राधिकरणका अनुसार सो अवधिसम्म ६२ हजार ५२३ वटा बीमालेख समर्पण भएको हो । पछिल्लो समय जीवन बीमा कम्पनीहरुमा बीमा पोलिसी त्याग गर्नेको संख्या बढ्दो छ । बीमितहरुमा अवधि परिपक्व नहुँदै बीमालेख त्याग गर्ने प्रवृत्ति बढ्दा जीवन बीमा क्षेत्रमा नराम्रो धक्का पुगेको छ ।  

जीवन बीमकहरुले चालु आवको ७ महिनासम्ममा ९५ अर्ब ३८ करोड ६६ लाख रुपैयाँ कुल बीमाशुल्क आर्जन गरेका छन् । सो अवधिसम्म सरेण्डर भएको रकम कुल व्यवसायको ९ प्रतिशत रकम हो । जीवन बीमकहरुले व्यवसाय उल्लेख्य बढाएपनि मासिक दरमा सरेण्डरमार्फत अर्बौ रकम बाहिरिँदै गएको छ ।  

बीमा पोलिसी समर्पण गर्नेको संख्या घटाउन नेपाल बीमा प्राधिकरणले विभिन्न खालका सचेतनामूलक कार्यक्रमहरु आयोजना गर्दै आइरहेको छ । 

साथै, जीवन बीमा कम्पनीहरुले समेत बीमालेख त्याग नहोस् भन्ने हेतुले व्यतित भएका बीमालेखहरु पुनर्जागरण गराउन नविकरण शुल्कमा शतप्रतिशत छुट दिदैं आइरहेको छ । तर बीमा कम्पनीहरुले ल्याएका यस्ता योजनाहरु प्रभावकारी हुन सकिरहेको छैन ।  

सो अवधिसम्म सबैभन्दा बढी एलआइसी नेपालबाट बीमालेख समर्पण भएको छ । कम्पनीबाट १५ हजार ३६२ बीमालेख बापत २ अर्ब ५९ करोड ७९ लाख रुपैयाँ पोलिसी सरेण्डर भएको छ ।  

यो रकम कुल सरेण्डर रकमको ३०.२४ प्रतिशत रकम हो । कम्पनीले सो अवधिसम्म ११ अर्ब १७ करोड ०९ लाख रुपैयाँ प्रिमियम संकलन गरेको छ । एलआइसी नेपालबाट कुल व्यवसायको २३.२५ प्रतिशत रकम हो । ७ महिनासम्ममा एलआइसी नेपालको कुल व्यवसायको २३ प्रतिशत रकम सरेण्डरमार्फत बाहिरिँदा कम्पनीको व्यवसाय धरापमा आउन सक्ने सम्भावना बढेको छ ।  

त्यस्तै, नेपाल लाइफबाट पनि सो अवधिसम्म १४ हजार २५ वटा बीमालेख बराबरको २ अर्ब ३६ करोड २४ लाख रुपैयाँ बराबरको बीमा पोलिसी त्याग भएको छ । यो रकम कुल सरेण्डर रकमको २७.५० प्रतिशत रकम हो ।  

यसका साथै राष्ट्रिय जीवन बीमा कम्पनीबाट ८ हजार ४९१ वटा बीमालेख बराबरको ७८ करोड ६४ लाख रुपैयाँ, नेशनल लाइफबाट ३ हजार ७२० वटा बीमालेख बराबरको ५५ करोड १५ लाख रुपैयाँ, एशियन लाइफबाट ५ हजार १११ वटा बीमालेख बराबरको ५४ करोड १९ लाख, सुर्यज्योति लाइफबाट ३ हजार ४८३ वटा बीमालेख बराबरको ४६ करोड ९९ लाख रुपैयाँ, हिमालयन लाइफबाट ४ हजार १३७ वटा बीमालेख बराबरको ३७ करोड ८१ लाख रुपैयाँ, मेट लाइफबाट २ हजार ९५ वटा बीमालेख बराबरको २४ करोड १२ लाख रुपैयाँ र सानिमा रिलायन्स लाइफबाट १ हजार ७७ वटा बीमालेख बराबरको १५ करोड ३६ लाख रुपैयाँ बराबरको बीमा पोलिसी सरेण्डर भएको छ ।  

त्यस्तै, सिटिजन लाइफबाट १ हजार ६६० वटा बीमालेख बराबरको १४ करोड ९१ लाख रुपैयाँ, प्रभु महालक्ष्मी लाइफबाट ८८२ वटा बीमालेख बराबरको १२ करो ४६ लाख रुपैयाँ, आइएमई लाइफबाट १ हजार ७३ वटा पोलिसी बराबरको १२ करोड ३१ लाख, रिलायबल नेपाल लाइफबाट ९६५ वटा बीमालेख बराबरको ६ करोड ४३ लाख रुपैयाँ र सन नेपाल लाइफबाट ४४२ वटा बीमालेख बराबरको ४ करोड ५५ लाख रुपैयाँको पोलिसी त्याग भएको छ ।