२१-दिने देशाटनपछि प्रोटोन e.MAS7 प्रति जगदम्बा मोटर्स उत्साहित, अटोमा नयाँ युगको सुरुवात हुने दाबी

काठमाण्डौ । जगदम्बा मोटर्स प्रा.लि. ले प्रोटोन e.MAS7 को सातवटै प्रदेशहरू पार गर्दै सम्पन्न भएको २१–दिने चुनौतिपूर्ण यात्रा सफलतापूर्वक सम्पन्न भएको घोषणा गरेको छ ।  

यो उपलब्धिले विभिन्न भौगोलिक र मौसमीय परिस्थितिहरूमा गाडीको उत्कृष्ट प्रदर्शन, विश्वसनीयता र कुशलताको प्रमाण दिएको कम्पनीले जनाएको छ ।  

प्रोटोन e.MAS7 अब मार्च २१ मा औपचारिक रूपमा सार्वजनिक उद्घाटनका लागि तयार छ, जसले नेपालको दिगो यातायातको दिशामा नयाँ युगको सुरुवात गर्ने कम्पनीको दाबी छ ।

 प्रोटोन e.MAS7 ले आफ्नो क्रस–कन्ट्री यात्रा गाडीको अनुकूलता र सहनशीलता वास्तविक परिस्थितिमा परीक्षणका लागि सुरु गरेको थियो। तराईका समथर फाँटदेखि हिमाली भूबनोटका कठोर बाटाहरू हुँदै, यो विद्युतीय सवारी साधनले विभिन्न भूभागहरूमा आफूलाई सफलतापूर्वक प्रमाणित गरेको समेत विज्ञप्तिमा दाबी गरिएको छ ।  

यस यात्राले स्थानीय समुदायलाई गाडीको उन्नत प्रविधि र वातावरणमैत्री विशेषताहरू प्रत्यक्ष अनुभव गर्ने अवसर पनि प्रदान गरेको बताइएको छ ।  

“यो यात्रा प्रोटोन e.MAS7 को क्षमताको प्रमाण हो र नेपाली बजारका लागि यसको तयारी दर्शाउँछ । हामी यो अत्याधुनिक विद्युतीय सवारी साधनलाई नेपालमा ल्याउन पाउँदा अत्यन्त उत्साहित छौं, जसले स्थायी, कुशल र किफायती यातायात समाधान प्रदान गर्नेछ,” जगदम्बा मोटर्स प्रा. लि.का कार्यकारी निर्देशक अखिल गुप्ताले भने । 

औपचारिक सार्वजनिक उद्घाटन कार्यक्रम मार्च २१ मा काठमाडौंमा आयोजना हुने बताइएको छ।

प्रोटोन e.MAS7 को सुरुवातसँगै, जगदम्बा मोटर्स प्रा. लि.ले नेपालको मोटर उद्योगमा क्रान्ति ल्याउने दाबी पेश गरेको छ । यसमा प्रदर्शन र आराममा कुनै सम्झौता नगरी वातावरणमैत्री विकल्प प्रदान गरिने विज्ञप्तिमा उल्लेख छ। कम्पनीले नेपालको हरित ऊर्जा लक्ष्यलाई समर्थन गर्दै नवप्रवर्तनात्मक विद्युतीय गतिशीलता समाधानहरूमार्फत कार्बन उत्सर्जन घटाउने प्रतिबद्धता पनि जनाएको छ।