विराटनगर भन्सारबाट १०८% ले बढ्यो निर्यात

काठमाण्डौ । चालु आवको ९ महिनाको अवधिमा विराटनगर भन्सार कार्यालयबाट निर्यात व्यापार १०८ प्रतिशतले बढेको छ । गत आर्थिक वर्षको ९ महिनामा विराटनगर भन्सार कार्यालय भएर करिब २३ अर्ब १५ करोड ६८ लाख ५१ हजार रुपैयाँ बराबरको विभिन्न वस्तु निर्यात भएकोमा चालू आर्थिक वर्ष यो कार्यालयबाट सोही अवधिमा निर्यात बढेर ४८ अर्ब १९ करोड ३२ लाख ५० हजार रुपैयाँ बराबरको वस्तु निर्यात भएको छ ।

यो कार्यालयबाट विगत ९ महिनामा असोज महिनादेखि निरन्तर निर्यात व्यापार बढेको छ । यहाँबाट भटमासको तेल र सूर्यमुखी तेलको निर्यातले आयात निर्यातको स्थिति सुध्रिदै गएको देखिन्छ ।  

विराटनगर भन्सार कार्यालय भएर गत वर्षभन्दा चालू आर्थिक वर्षको नौ महिनामा आयात भने १९ प्रतिशतले बढेको छ । आर्थिक वर्ष ०८०/८१ मा १ खर्ब २६ अर्ब ४२ करोड ७२ लाख ५० हजार रुपैयाँ बराबरको वस्तुहरु आयात भएकोमा चालू आर्थिक वर्ष ०८१/८२ को सोही अवधिमा एक खर्ब ५० अर्ब ५५ करोड ८२ लाख २४ हजार रुपैयाँ बराबरको विभिन्न वस्तुहरु आयात भएको छ ।  

चालू आर्थिक वर्ष ०८१/८२ को विगत ९ महिनामा विराटनगर भन्सार कार्यालय भएर मूल्यका आधारमा प्रशोधित भटमासको तेल, सेन्थेटिक यार्न, जुटको कपडा, प्रशोधित सूर्यमुखी तेल, तयारी कपडा, जुटको बोरा, प्लाईउड लगायतका वस्तुहरु निर्यात भएको छ ।

सबैभन्दा बढी करिब २० अर्ब ५२ करोड १७ लाख १० हजार रुपैँया बराबरको प्रशोधित भटमासको तेल निर्यात भएको छ । यसैगरी मूल्यका आधारमा भटमासको कच्चा तेल, एचआर सिट, पोलिथिन दाना, शुद्ध फलाम, एलपी ग्याँस, सूर्यमुखी कच्चा तेल लगायतका वस्तुहरु आयात भएको छ ।