नेपालमा फेसबुक बन्द, इन्टरनेट प्रदायकबाट सरकारी निर्देशनको पालना सुरु

काठमाण्डौ । नेपालमा सामाजिक सञ्जाल प्लेटफर्म फेसबुक बन्द हुन थालेको छ।  

इन्टरनेट सेवा प्रदायक कम्पनीहरुले एकपछि अर्को निर्णय गर्दै आफ्ना ग्राहकहरुको डिभाइसमा फेसबुक चल्न नसक्ने बनाउन थालेका हुन् । 

सरकारले फेसबुक लगायतका सामाजिक सञ्जालहरु क्रमशः बन्द गर्ने निर्णय गरेसँगै दूरसञ्चार प्राधिकरणलाई पत्र पठाएको र प्राधिकरणले इन्टरनेट सेवा प्रदायकलाई पत्राचार गरेको थियो । त्यसको रेसपोन्समा एनसेलले आफ्नो नेटवर्कमा फेसबुक नचल्ने बनाइसकेको छ ।  

यो क्रममा देशकै सबैभन्दा ठूलो इन्टरनेट सेवाप्रदायक वर्ल्डलिंकले पनि केहीबेरअघिदेखि फेसबुक नचल्ने बनाएको छ । यो कम्पनीको इन्टरनेट प्रयोग गर्नेहरुको डिभाइसमा केहीबेरअघिदेखि फेसबुक चल्न छाडेको छ ।  

वर्ल्डलिंकका प्रमुख कार्यकारी अधिकृत केशव नेपालका अनुसार, सरकारले दिएको निर्देशनको पालना गर्दै फेसबुक बन्द गरिएको हो। वर्ल्डलिंकको आईपी एड्रेसमार्फत अब फेसबुक चल्दैन ।  

इन्टरनेट सेवा प्रदायक संघका अध्यक्ष सुधिर पराजुलीले पनि फेसबुक बन्द गर्ने प्रक्रिया सुरु भइसकेको र सबै प्रदायकमार्फत पूर्ण रूपमा बन्द हुन केही समय लाग्ने प्रष्ट पारे ।