जेनजीको कैयन कल बालेनले उठाएनन्, त्यसपछि सुशीला कार्कीलाई अन्तरिम सरकारको प्रधानमन्त्री बनाउने सहमति

काठमाण्डौ । जेनजीको भर्चुअल बैठकमा सहभागीहरुले अन्तरिम सरकारको सम्भावित प्रधानमन्त्रीको रुपमा चर्चा गरिएका बालेन शाहले कैयौ पटक फोन गर्दा पनि रेसपोन्स नगरेको गुनासो गरेका छन् ।  

जेनजीको भर्चुअल बैठकको संक्षिप्त माइन्यूट सार्वजनिक भएको हो । जसमा भावी प्रधानमन्त्रीको रुपमा बालेन शाहको धारणा बुझ्न पटक पटक कल गर्दा पनि उनले फोन रेसपोन्स नगरेका दाबी गरिएको छ । 

जेनजीहरुले बालेन शाहले रेसपोन्स नगरेपछि दोश्रो विकल्पको रुपमा सुशीला कार्कीको नाम अगाडि सारेका थिए । सुशीला कार्की पनि सरकारको नेतृत्व गर्ने विषयमा स्पष्ट नभएको, तर जेनजीहरुले हस्ताक्षर संकलन गरेर अगाडि बढाउन चाहन्छन् भने नेतृत्व लिन तयार रहेको बताएको बैठकमा रिपोर्टिङ भएको छ ।  

तेश्रो विकल्पमा रास्वपा सांसद सुमना श्रेष्ठको नाम ल्याइएको थियो । तर श्रेष्ठले आफू दलमा आबद्ध भएकोले सरकारको नेतृत्वका लागि अगाडि बढ्न नसक्ने जवाफ दिएकी थिइन् ।  

धरान उपमहानगरपालिकाका मेयर हर्क साम्पाङ चाहिँ सरकारको नेतृत्व गर्न तयार रहेका सो क्रममा जेनजीहरुले बताएका छन् । 

सागर ढकाल पनि तयार नै रहेका तर धनगढीमा अड्किएका सो क्रममा बताइएकोछ ।  

कुलमान घिसिंगलाई भने मेन्टरको रुपमा जेनजीले स्वीकार गरेका देखिएको छ ।  

र्याण्डम नेपाली नामका राष्ट्रविमोचन तिमिल्सिनाले चाहिँ कसैले नचाहेको खण्डमा मात्र आफू तयार रहेको बताएका रिपोर्टिंग भएको स्रोतको भनाई छ ।  

बालेनको निजी सचिवालयका एक सदस्यले अन्तरिम सरकारको नेतृत्व गर्न उनी इच्छुक छैनन् । ताजा जनादेशमा मुलुक गई प्रत्यक्ष निर्वाचित प्रधानमन्त्रीको व्यवस्था हुनुपर्ने र त्यसका लागि आफू तयार रहेको उनले निकटस्थहरुलाई बताउने गरेका छन् । जनमतसहितको बलियो प्रधानमन्त्री बनेर देशको कायापलट गर्ने उनको इच्छा रहेका कारण अहिले नै उनले अगाडि बढ्ने चाहना नदेखाएका हुनसक्ने स्रोत बताउँछ ।