म्युचुअल फण्डहरुको नाफा ३३% ले बढ्यो, सेयरबजारमा पौने ३१ अर्ब लगानी

काठमाण्डौं । म्युचुअल फण्डहरुले फागुन महिनामा साढे ६६ करोड रुपैयाँ नाफा आर्जन गरेका छन् । सञ्चालनमा रहेका ४४ वटा म्युचुअल फण्डले फागुन महिनामा ६६ करोड ४६ लाख रुपैयाँ नाफा कमाएका हुन् ।  

यो नाफा माघ महिनाको तुलनामा ३३.३७ प्रतिशतले बढी हो । माघमा यी फण्डहरुले ४९ करोड ८३ लाख रुपैयाँ नाफा कमाएका थिए ।  

सेयरबजार उचारचढाव हुँदा म्युचुअल फण्डहरुको लगानी, प्रतिइकाई खुद सम्पत्ति मूल्य ९न्याभ० र नाफा समेत घटबढ हुने गर्दछ । बजार बढ्दा म्युचुअल फण्डहरुको नाफा र न्याभ बढ्न जान्छ भने सूचीकृत सेयरमा लगानीको दायरा समेत बढ्न जान्छ ।  

फागुन महिनामा सत्ता गठबन्धन परिवर्तन भएसँगै सेयरबजारमा एक साता हरियाली छाएको थियो । फागुन २१ गते नेप्से इन्डेक्स सर्किट ब्रेक लागेर सेयरबजार बन्द भएको थियो । सो दिन नेप्से परिसूचक ११७.७० अंकले बढेर २०७८ को विन्दुमा पुगेको थियो ।  

त्यसपछिका कारोबार दिन फागुन २३ गते नेप्से सूचक ९।३३ अंक, फागुन २४ गते १३।५१ अंक, फागुन २७ गते २२.१० अंक र फागुन २९ गते नेप्से परिसूचक ५८.५५ अंकले बृद्धि भएको थियो ।  

फागुन महिनाको सुरुवाती दिनमा सेयरबजारमा खासै सुधार नदेखिएपनि अन्तिमतिर बजारमा आक्रामक सुधार देखिँदा म्युचुअल फण्डहरुले नाफा बुक गरेका छन् । साथै नाफामा सुधार देखिएसँगै फण्डहरुले सेयरबजारमा लगानी समेत थपेका छन् ।  

बजार सोचेजस्तो बढ्न नसक्दा म्युचुअल फण्डहरुले अझै नाफामा उल्लेख्य सुधार गर्न सकेका छैनन् । सञ्चालनमा रहेका ४४ वटा म्युचुअल फण्डमध्ये १२ वटा फण्डको नाफा र न्याभ बढ्न सकेको छैन ।  

नेपाल धितोपत्र बोर्डले म्युचुअल फण्डहरुलाई सेयर बिक्रीमा ६ महिना लकइन अवधि लागू गरेपछि फण्डहरुको नाफा र न्याभ भनेजस्तो बृद्धि हुन नसकेको मर्चेण्ट बैंकहरुले बताउँदै आएका छन् ।  

६ वटा म्युचुअल फण्डको न्याभ ११ रुपैयाँमाथि  

सञ्चालनमा रहेका ४४ वटा म्युचुअल फण्डमध्ये ६ वटा फण्डको न्याभ ११ रुपैयाँमाथि छ । जसमा सबैभन्दा बढी एनएमबी सुलभ इन्भेष्टमेन्ट फण्ड–२ को न्याभ ११.४५ रुपैयाँ छ ।  

माघ महिनाको तुलनामा उक्त फण्डको न्याभ १८ पैसाले बृद्धि भएको हो । फागुनमा सो फण्डको न्याभ ११.२७ रुपैयाँ थियो । त्यस्तै, दोस्रोमा सनराईज फर्स्ट म्युचुअल फण्डको न्याभ ११.३० रुपैयाँ छ भने चौथोमा सानिमा इक्विटी फण्डको न्याभ ११.२५ रुपैयाँ छ ।  

यसका साथै कुमारी सुनौलो लगानी योजनाको फण्ड ११।१३ रुपैयाँ, एनआइसी एशिया सेलेक्ट–३० को ११.११ रुपैयाँ र एनआइसी एशिया ग्रोथ फण्डको ११.०३ रुपैयाँ छ ।  

माघ महिनाको तुलनामा फागुनमा ३२ वटा फण्डको न्याभ बृद्धि भएको छ भने नबिल ब्यालेन्स्ड फण्ड–२ को न्याभ स्थिर र बाँकी ११ वटाको न्याभ घटेको छ ।  

सर्वाधिक घट्नेमा एनआइसी एशिया फ्लेक्सी क्याप फण्ड रहेको छ । माघमा ११ रुपैयाँ रहेको उक्त फण्डको न्याभ फागुनमा ०.०५ रुपैयाँले घटेर १०.९५ रुपैयाँ कायम भएको छ ।  

३२ वटा फण्डको नाफा वृद्धि

४४ वटा म्युचुअल फण्डमध्ये माघ महिनाको तुलनामा फागुनमा ३२ वटा फण्डले नाफा बढाएका छन् । फागुन महिनामा ४४ फण्डले कुल ६६ करोड ४६ लाख रुपैयाँ नाफा कमाएका छन् । यो नाफा माघ महिनाको तुलनामा ३३.३७ प्रतिशतले बढी हो ।  

माघमा फण्डहरुले ४९ करोड ८३ लाख रुपैयाँ मात्रै नाफा कमाएका थिए । अधिकांश फण्डले फागुनमा प्रोफिट अर्न गर्न सफल भएका छन् ।  

सबैभन्दा बढी नाफा कमाउनेमा एनआइसी एशिया ग्रोथ फण्ड रहेको छ । फण्डले फागुन महिनामा ८ करोड १३ लाख रुपैयाँ नाफा कमाएको छ । यो नाफा अघिल्लो महिनाको तुलनामा ३.०३ प्रतिशतले बढी हो । अघिल्लो महिनामा उक्त फण्डले ७ करोड ८९ लाख रुपैयाँ नाफा कमाएको थियो ।  

त्यस्तै, हिमालयन ८०–२० ले पनि ७ करोड १७ लाख रुपैयाँ नाफा कमाएर दोस्रो बढी नाफा कमाउने म्युचुअल फण्ड बनेको छ । फण्डले माघ महिनाको  तुलनामा २।४१ प्रतिशतले नाफा बढाएको छ ।  

त्यस्तै, तेस्रोमा प्रभु सेलेक्ट फण्ड रहेको छ । फण्डले फागुनमा ६ करोड ७९ लाख रुपैयाँ नाफा कमाएको छ । यो नाफा माघको तुलनामा ५।७८ प्रतिशतले कम हो ।  

माघ महिनाको तुलनामा फागुनमा सबैभन्दा बढी नाफा बढाउनेमा एनएमबी सुलभ इन्भेष्टमेन्ट ग्रोथ स्किम–३ रहेको छ । फण्डले १९१४ प्रतिशतले नाफा बढाएको छ । माघमा ११ लाख २५ हजार रुपैयाँ मात्रै नाफा कमाएको उक्त फण्डले फागुनमा २ करोड २६ लाख रुपैयाँ नाफा कमाएको छ ।

सेयरबजारमा म्युचुअल फण्डको पौने ३१ अर्ब लगानी  

म्युचुअल फण्डहरुले सेयरबजारमा ३० अर्ब ७२ करोड रुपैयाँ लगानी गरेका छन् । माघ महिनाको तुलनामा ४४ वटा म्युचुअल फण्डको सेयरबजारमा लगानी ४.७५ प्रतिशतले बढेको छ ।

माघ महिनामा उक्त फण्डहरुले २९ अर्ब ३२ करोड रुपैयाँ सेयरबजारमा लगानी गरेका थिए । म्युचुअल फण्डहरुको लगानीको ठूलो हिस्सा सेयरबजारमा रहेको हुन्छ । म्युचुअल फण्डहरुले लगानी थपेको खण्डमा सेयरबजार बढ्ने बढी सम्भावना रहन्छ ।  

अर्थात् बजारमा उतारचढाव आउँदा पनि म्युचुअल फण्डहरुको नाफा र न्याभ दुबै प्रभावित हुन जान्छ । माघ महिनाको तुलनामा फागुनमा ३ वटा फण्डको मात्रै सेयरबजारमा लगानी घटेको छ । बाँकी सबै फण्डको लगानी बृद्धि देखिन्छ ।  

फागुनमा ६ वटा म्युचुअल फण्डको सेयरबजारमा १ अर्ब भन्दा बढी लगानी छ । सबैभन्दा बढी एनआइबीएल सहभागीता फण्डको १ अर्ब ७२ करोड रुपैयाँ सूचीकृत सेयरमा लगानी छ ।  

त्यस्तै, दोस्रोमा एनएमबी सरल बचत फण्ड–ई को १ अर्ब ३६ करोड, सिद्धार्थ इक्विटी फण्डको १ अर्ब १५ करोड, एनएमबी सुलभ इन्भेष्टमेन्ट फण्ड–२ को १ अर्ब ९ करोड, एनएमबी–५० को १ अर्ब ५ करोड रुपैयाँ र सानिमा इक्विटी फण्डको १ अर्ब ४ करोड रुपैयाँ सेयरबजारमा लगानी रहेको छ ।