घट्यो कुथेली बुखरी स्मल हाइड्रोपावरको नाफा

काठमाण्डौ । कुथेली बुखरी स्मल हाइड्रोपावर लिमिटेडको नाफामा चालु आर्थिक वर्षको दोस्रो त्रैमाससम्म गिरावट देखिएको छ ।  कम्पनीले समीक्षा अवधिसम्म ८३ लाख २० हजार रुपैयाँ खुद नाफा आर्जन गरेको छ, जुन अघिल्लो आर्थिक वर्षको सोही अवधिको ८८ लाख ४६ हजार रुपैयाँको तुलनामा ५.९५ प्रतिशतले कम हो।

विद्युत बिक्री आम्दानी घट्नु नाफा संकुचनको प्रमुख कारण बनेको छ। यस अवधिमा कम्पनीले विद्युत बिक्रीमार्फत १ करोड ९४ लाख रुपैयाँ आम्दानी गरेको छ, जुन अघिल्लो वर्षको १ करोड ९९ लाख रुपैयाँको तुलनामा २.५४ प्रतिशतले न्यून हो।

यद्यपि, कम्पनीले वित्त खर्चमा उल्लेखनीय कटौती गर्न सफल भएको छ। अघिल्लो वर्ष १८ लाख ७० हजार रुपैयाँ रहेको वित्त खर्च घटेर यस वर्ष ९ लाख ८२ हजार रुपैयाँमा सीमित भएको छ। यसले कम्पनीको ऋण व्यवस्थापन र वित्तीय दायित्व नियन्त्रणमा सुधार भएको संकेत गर्छ। प्रशासनिक खर्च भने ३१ लाख २० हजार रुपैयाँ पुगेको छ।

कम्पनीको चुक्तापूँजी १३ करोड ४० लाख रुपैयाँ रहेको छ भने रिजर्भ ५ करोड ५९ लाख रुपैयाँमा झरेको छ, जुन अघिल्लो वर्ष ६ करोड १८ लाख रुपैयाँ थियो। कम्पनीसँग २ करोड २५ लाख रुपैयाँ दीर्घकालीन कर्जा र २१ लाख ४४ हजार रुपैयाँ अल्पकालीन कर्जा रहेको छ।

कम्पनीको कुल चालु सम्पत्ति १ करोड ४६ लाख रुपैयाँ र चालु दायित्व ३६ लाख ७९ हजार रुपैयाँ रहेको छ ।

समीक्षा अवधिसम्म कम्पनीको प्रतिसेयर आम्दानी (ईपीएस) १२.४१ रुपैयाँ, प्रतिसेयर नेटवर्थ १४१.७६ रुपैयाँ, प्रतिसेयर कुल सम्पत्ति मूल्य १६१.२९ रुपैयाँ तथा मूल्य–आम्दानी अनुपात १३२.९२ गुणा कायम भएको छ।