पहिरो हटेपछि सडकमा यातायात सञ्चालनमा, कतै भने एकतर्फी मात्रै

काठमाण्डौं । अविरल वर्षासँगै देशका विभिन्न क्षेत्रमा आएको बाढी र पहिरोका कारण प्रभावित भएका सडकहरू क्रमशः खुल्न थालेका छन् ।  

अवरुद्ध बनेका राजमार्गहरूमा पहिरो पन्छाउने काम तीव्र भएपछि केही स्थानमा यातायात पुनः सञ्चालनमा ल्याइएको हो ।

प्रहरीका अनुसार ललितपुरको भालुखोला क्षेत्रमा पर्ने कान्तिलोकपथ, ताप्लेजुङको थुकिम्बा–दोभान भित्री सडक, सिन्धुपाल्चोकको कोदारी नजिक ईकु पहिरोले अवरुद्ध अरनिको राजमार्ग तथा मकवानपुरको भर्‍याङडाँडास्थित कान्तिलोकपथमा सवारी आवागमन पुनः शुरु भएको छ ।

केन्द्रीय प्रहरी प्रवक्ता अविनारायण काफ्लेका अनुसार कतिपय सडक पूर्ण रूपमा सञ्चालनमा आइसकेका छन् भने केही स्थानमा अझै एकतर्फी रूपमा मात्रै सवारी चलिरहेका छन् । 

भोजपुर–बोखिम खण्डको मध्यपहाडी लोकमार्ग र म्याग्दीको बेनी–जोमसोम सडकखण्ड हाल आंशिक रूपमा सञ्चालनमा छन् ।

तर, सबै सडक खुलिसकेका भने छैनन् । इलामको सलकपुर–डखेप हुँदै झापा जोड्ने कच्ची सडक, काभ्रेपलाञ्चोकको चौकीडाँडा–घुमाउने क्षेत्रमा पर्ने बीपी राजमार्ग तथा लमजुङको बिमिरेभञ्ज्याङस्थित मध्यपहाडी लोकमार्ग अझै अवरुद्ध नै रहेका छन् ।

यस्तै, काभ्रेपलाञ्चोकको खुर्कोट–नेपालथोक–कटुञ्जेबेसी सडकखण्डमा भने पूर्ण रूपमा सवारी सञ्चालन रोकिएको छ ।

प्रहरीले वर्षायाममा यस्ता घटनाहरू दोहोरिने जोखिम उच्च रहने भन्दै यात्रुहरूलाई यात्रा अघि सडक अवस्थाबारे जानकारी लिन, सम्भव भएसम्म जोखिमयुक्त मार्ग प्रयोग नगर्न र सावधानीपूर्वक यात्रा गर्न आग्रह गरेको छ ।