चुनावपछि बंगालमा रक्तपात, बीजेपी–टीएमसी कार्यकर्ता आमनेसामने, चार जनाको ज्यान गयो

काठमाण्डौं । भारतीय जनता पार्टी पहिलोपटक बहुमतसहित सरकार गठनको तयारीमा रहेको समयमा भारतीय राज्य पश्चिम बंगालमा राजनीतिक तनाव हिंसामा परिणत भएको छ ।  

भारतीय सञ्चारमाध्यमका अनुसार मंगलबार राति कोलकाता को नयाँ बजार क्षेत्रमा एउटा समूहले तृणमूल कंग्रेस को पार्टी कार्यालयमा बुलडोजर चलाएको छ।  

 

आक्रमणका क्रममा वरपरका पसलहरूमा समेत तोडफोड गरिएको बताइएको छ।

घटनाको भिडियो सार्वजनिक गर्दै तृणमूल कंग्रेसले सामाजिक सञ्जालमा टिप्पणी गरेको छ कि “भाजपाको परिवर्तन बुलडोजरसहित आएको छ।”

तृणमूल कंग्रेस पश्चिम बंगालकी मुख्यमन्त्री ममता बनर्जी को नेतृत्वमा रहेको दल हो।

यसबीच, ममता बनर्जीको निवास, उनका भतिजा अभिषेक बनर्जी को घर तथा कोलकातास्थित पार्टी मुख्यालयबाट अतिरिक्त सुरक्षा फौज हटाइएको छ। 

बुधबार ती स्थानहरूमा प्रहरी उपस्थिति न्यून देखिएको थियो, साथै ममताको निवासअगाडिका ब्यारिकेडहरू पनि हटाइएको छ।

अभिषेक बनर्जी डायमन्ड हार्बर बाट सांसद हुन् र उनको जेड–श्रेणीको सुरक्षा भने यथावत रहेको छ।

पछिल्लो २४ घण्टामा भएको हिंसामा चार जनाको ज्यान गएको छ, जसमा दुई जना भाजपा र दुई जना तृणमूल कंग्रेसका कार्यकर्ता रहेको जनाइएको छ।

भाजपाले उत्तर २४ परगना र हावडा मा आफ्ना कार्यकर्ता हत्या भएको आरोप तृणमूलमाथि लगाएको छ।

यता तृणमूल कंग्रेसले भने कोलकाता र वीरभूम मा आफ्ना दुई कार्यकर्ताको हत्या भाजपाका समर्थकबाट भएको दाबी गरेको छ।

एजेन्सी