मूल्यह्रास र ब्याज खर्चले थिचियो शिखर पावरः बुक भ्यालु रु. १०० भन्दा तल, जोखिमको संकेत

काठमाण्डौ । शिखर पावर डेभलपमेन्ट लिमिटेड चालु आर्थिक वर्षको तेस्रो त्रैमाससम्म पनि घाटामै देखिएको छ । विद्युत बिक्रीबाट आम्दानी बढे पनि उच्च मूल्यह्रास खर्च, प्रशासनिक दबाब र कमजोर सञ्चालन नतिजाका कारण कम्पनीको वित्तीय अवस्था दबाबमा देखिएको हो ।

कम्पनीले सार्वजनिक गरेको अपरिष्कृत वित्तीय विवरणअनुसार समीक्षा अवधिसम्म ४ करोड ८६ लाख रुपैयाँभन्दा बढी खुद घाटा व्यहोरेको छ । अघिल्लो आर्थिक वर्षको यही अवधिमा कम्पनी ३२ लाख ३४ हजार रुपैयाँ घाटामा रहेको थियो । यसरी हेर्दा कम्पनीको घाटा एक वर्षमै तीव्र रूपमा बढेको देखिन्छ ।

तेस्रो त्रैमाससम्म कम्पनीले २ करोड ५४ लाख रुपैयाँ सञ्चालन आम्दानी गरेको छ । अघिल्लो वर्ष यही अवधिमा यस्तो आम्दानी १७ लाख ५३ हजार रुपैयाँ मात्रै रहेको थियो । उत्पादन तथा बिक्री बढेकाले आम्दानीमा उल्लेख्य सुधार आएको देखिए पनि त्यसअनुसार नाफा आउन सकेन ।

कम्पनीको कुल आम्दानी २ करोड ३६ लाख रुपैयाँ पुगेको छ । तर मूल्यह्रास तथा अमोर्टाइजेसन खर्च मात्रै ३ करोड ८ लाख रुपैयाँ पुगेपछि सञ्चालन नतिजा कमजोर बनेको हो । यही कारण कम्पनी सञ्चालन तहबाटै १ करोड ५२ लाख रुपैयाँ घाटामा पुगेको छ ।

त्यसमाथि वित्त खर्च पनि बढेको छ । समीक्षा अवधिमा कम्पनीले ३८ लाख रुपैयाँभन्दा बढी वित्त खर्च व्यहोरेको छ । परिणामस्वरूप करअघिको घाटा ४ करोड ८६ लाख रुपैयाँ पुगेको देखिन्छ ।

कम्पनीको वित्तीय संरचनामा भने केही सकारात्मक संकेत पनि देखिएका छन् । आईपीओ निष्कासनपछि कम्पनीको चुक्ता पूँजी ९८ करोड रुपैयाँ पुगेको छ, जुन अघिल्लो वर्ष ६६ करोड रुपैयाँ थियो । यसले कम्पनीले पूँजी आधार विस्तार गरेको देखिन्छ ।

तर पूँजी बढे पनि कम्पनीको सञ्चित नोक्सानी अझै गहिरो छ । कम्पनीको अन्य इक्विटी ३ करोड ३४ लाख रुपैयाँ ऋणात्मक रहेको छ । यसले विगतका घाटाको असर अझै कायम रहेको संकेत गर्छ ।

तेस्रो त्रैमाससम्म कम्पनीको कुल सम्पत्ति १ अर्ब ६१ करोड रुपैयाँभन्दा माथि पुगेको छ । यसमध्ये १ अर्ब २२ करोड रुपैयाँभन्दा बढी अमूर्त सम्पत्तिमा रहेको छ ।

कम्पनीको दीर्घकालीन ऋण ६६ करोड ६४ लाख रुपैयाँ रहेको छ । यद्यपि अघिल्लो वर्षको तुलनामा ऋण केही घटेको देखिन्छ । नगद तथा नगद सरह मौज्दात भने १४ करोड ५३ लाख रुपैयाँ पुगेको छ, जसले तरलता अवस्थामा केही सुधार आएको संकेत गर्छ ।

कम्पनीको प्रतिसेयर आम्दानी (इपीएस) ७.४७ रुपैयाँले ऋणात्मक बनेको छ भने प्रतिसेयर नेटवर्थ ९६.५८ रुपैयाँ कायम रहेको छ । अर्थात्, १०० रुपैयाँ अंकित मूल्यको आधारमा कम्पनीको बुक भ्यालु अझै अंकित मूल्यभन्दा तल देखिएको छ ।

विश्लेषकहरूका अनुसार जलविद्युत कम्पनीहरूमा आयोजना सञ्चालनको प्रारम्भिक चरणमा उच्च मूल्यह्रास, ब्याज खर्च तथा ऋणको दबाबका कारण सुरुवाती वर्षहरूमा घाटा देखिनु अस्वाभाविक होइन । तर उत्पादन क्षमता र नगद प्रवाह दिगो रूपमा बढ्न नसके भविष्यमा पनि कम्पनीमाथि वित्तीय दबाब कायम रहन सक्ने संकेत शिखर पावरको पछिल्लो विवरणले गरेको छ ।