वैशाखमा बढ्यो घरजग्गा कारोबार र राजश्व संकलन

काठमाण्डौ । वैशाख महिनामा घरजग्गा कारोबार वृद्धि भएको छ । भूमि व्यवस्थापन तथा अभिलेख विभागका अनुसार गत महिना देशभर घरजग्गा कारोबारबाट सरकारले ६ अर्ब २६ करोड ३८ लाख रुपैयाँबराबरको राजश्व संकलन गरेको छ ।

अघिल्लो वर्षको सोही अवधिसम्म भने सरकारले घरजग्गा कारोबारमार्फत ४ अर्ब ५४ करोड २२ लाख रुपैयाँ राजश्व उठाएको थियो ।

२०८२ चेत महिनामा भने सरकारले ६ अर्ब १६ करोड ५७ लाख रुपैयाँबराबरको राजश्व संकलन गरेको थियो ।

वैशाख महिनामा ५८ हजार ८८६ लिखत पारित भएको छ । गत वर्षको सोही अवधिमा भने ५२ हजार ४१५ लिखत पास भएको थियो । यस्तै गत चैतमा भने ५५ हजार ५३१ लिखत पारित भएको विभागको तथ्यांकले देखाउँछ ।

वैशाखमा सबैभन्दा बढी लिखत पास दाङ जिल्लामा भएको छ । दाङको तिनवटा भूमि प्रशासन कार्यालयबाट वैशाख महिनामा ३ हजार ३७८ वटा लिखत पारित भएको छ । यस्तै मोरङबाट ३ हजार ३०४ वटा र झापाबाट ३ हजार ७५ लिखत पारित भएको छ ।