संसदमा रास्वपा सांसद कार्कीविरुद्ध यौन प्रकरणको प्रश्न, विवादित आरोपमाथि सभामुखको ध्यानाकर्षण

काठमाण्डौं । प्रतिनिधिसभाको मंगलबारको बैठकमा नेपापाकी सांसद पार्वती बिकले राष्ट्रिय स्वतन्त्र पार्टी (रास्वपा) का सांसद कृष्णकुमार कार्कीविरुद्ध सामाजिक सञ्जालमा सार्वजनिक भएको विवादित यौन प्रकरणबारे सदनमै प्रश्न उठाउँदै सभामुखको ध्यानाकर्षण गराएकी छन् ।  

उनले उक्त विषय गम्भीर प्रकृतिको भएकाले संसदभित्रै छलफल हुनुपर्ने आवश्यकता रहेको बताएकी हुन् ।

बैठकमा बोल्दै सांसद बिकले एक सत्तापक्षका सांसदले नाइजेरियाकी एक युवतीलाई काठमाडौँमा गर्भवती बनाएर पछि अलपत्र पारेको भन्ने आरोप विभिन्न सामाजिक सञ्जाल तथा सञ्चार माध्यममा व्यापक रूपमा फैलिएको उल्लेख गरिन् ।  

उनले यस्तो प्रकारका घटनाले व्यक्तिगत चरित्र मात्र नभई मुलुककै छविमा समेत नकारात्मक असर पार्ने भएकाले संसदले यस विषयमा स्पष्टता दिनुपर्ने धारणा राखिन् ।

‘एक जना सत्तापक्षका सांसदले एक विदेशी महिलालाई गर्भवती बनाएर बेपत्ता भएको भन्ने कुरा सामाजिक सञ्जालमा यत्रतत्र सर्वत्र छ,’ उनले भनिन्, ‘यसले अत्यन्तै पीडादायी अवस्था सिर्जना गरेको छ।  

अन्तर्राष्ट्रिय रूपमा नेपाली नागरिकप्रति बनिने धारणा र हाम्रो देशको छविमा समेत प्रश्न उठ्न सक्छ।’

सांसद बिकले घटनाबारे सत्य–तथ्य के हो भन्नेबारे संसदलाई औपचारिक जानकारी दिन सभामुखसँग आग्रह गरिन् । 

उनका अनुसार यदि आरोप प्रमाणित भएमा सम्बन्धित सांसदलाई कानूनी तथा राजनीतिक दुवै रूपमा जवाफदेही बनाइनुपर्ने आवश्यकता छ ।

‘हामी सबैलाई निगरानीमा राखिएको हुन्छ, हामी सबै काँचको सिसाभित्र छौँ,’ उनले भनिन्, ‘यस्ता विषयमा गम्भीरता देखाउनुपर्ने थियो, तर त्यो देखिएन।’

सामाजिक सञ्जालमा फैलिएको आरोपअनुसार नाइजेरियाकी एक युवतीले आफूलाई काठमाडौँको ठमेल क्षेत्रमा सांसद कार्कीले गर्भवती बनाएर अलपत्र पारेको दाबी गरेकी छन् ।  

तर, सांसद कार्कीले यस विषयमा हालसम्म कुनै औपचारिक प्रतिक्रिया दिएका छैनन् ।

मोरङ–२ बाट निर्वाचित सांसद कार्कीमाथि उठेको यो विवादले संसदभित्र पनि बहस र चासो बढाएको छ ।