कोशी, बागमती र गण्डकीमा हल्कादेखि मध्यम वर्षा हुने मौसम महाशाखाको अनुमान

काठमाण्डौं । मौसम पूर्वानुमान महाशाखाका अनुसार हाल बुधबार बिहान देशका धेरै प्रदेशमा आंशिकदेखि सामान्य बादल देखिएको छ भने केही पहाडी र हिमाली क्षेत्रमा हल्कादेखि मध्यम वर्षा पनि भइरहेको छ ।

महाशाखाका अनुसार कोशी, मधेश, बागमती र गण्डकी प्रदेशका पहाडी तथा हिमाली भू-भागमा सामान्यतया बादल लागेको छ ।

गण्डकी प्रदेशका तराई क्षेत्र तथा अन्य पहाडी र हिमाली भागमा आंशिक बादल देखिएको छ भने बाँकी तराई क्षेत्रमा मौसम मुख्यतया सफा रहेको छ ।

यसैबीच कोशी, बागमती र गण्डकी प्रदेशका पहाडी र हिमाली क्षेत्रका केही स्थानमा अहिले हल्कादेखि मध्यम वर्षा भइरहेको महाशाखाले जनाएको छ ।

दिउँसोको पूर्वानुमानअनुसार कोशी, मधेश, बागमती, गण्डकी, लुम्बिनी र कर्णाली प्रदेशका हिमाली तथा पहाडी क्षेत्रमा सामान्यतया बादल लाग्नेछ ।

बाँकी भू-भागमा आंशिक बादल र तराई क्षेत्रमा मुख्यतया सफा मौसम रहने सम्भावना छ ।

दिउँसो कोशी, बागमती र गण्डकी प्रदेशका केही स्थानमा तथा लुम्बिनी र कर्णाली प्रदेशका पहाडी–हिमाली क्षेत्रमा थोरै स्थानमा मध्यम वर्षा हुन सक्ने अनुमान छ ।

हिमाली क्षेत्रमा हिमपातको सम्भावना पनि रहेको महाशाखाले जनाएको छ । 

सुदूरपश्चिम र लुम्बिनी प्रदेशका तराई क्षेत्रमा भने तातो दिन रहने सम्भावना देखिएको छ ।

रातिको मौसम पनि बदलिँदो रहनेछ । राति कोशी, मधेश, बागमती र गण्डकी प्रदेशमा सामान्यतया बादल रहनेछ भने अन्य पहाडी तथा हिमाली क्षेत्रमा आंशिक बादल रहनेछ ।

तराई भू-भागमा मौसम मुख्यतया सफा रहने अनुमान गरिएको छ ।

राति कोशी, मधेश, बागमती र गण्डकी प्रदेशका केही स्थानमा मेघगर्जन र चट्याङसहित हल्का वर्षा हुने सम्भावना छ भने उच्च पहाडी र हिमाली क्षेत्रमा हल्का हिमपात हुन सक्ने महाशाखाले जनाएको छ ।

यसैबीच काठमाडौं उपत्यकाको मौसम बिहानैदेखि धुम्म बनेको छ ।

मौसमविद्हरूका अनुसार बागमती र गण्डकी प्रदेशबीच विकसित भएको मौसमी प्रणालीका कारण उपत्यकामा बदली भएको हो ।

मौसमविद् अनुसार दिउँसोसम्म हल्कादेखि मध्यम वर्षा हुन सक्ने सम्भावना छ भने दिउँसोपछि क्रमशः मौसम केही खुल्दै घाम देखिने अनुमान गरिएको छ ।

मौसमविद्हरूका अनुसार २४ घण्टाको वर्षा परिमाणअनुसार १० मिलिमिटरभन्दा कमलाई हल्का, १० देखि ५० मिलिमिटरलाई मध्यम, ५० देखि १०० मिलिमिटरलाई भारी, १०० देखि २०० मिलिमिटरलाई धेरै भारी र २०० मिलिमिटरभन्दा बढीलाई अति भारी वर्षा मानिन्छ ।

त्यस्तै, भू–भागका आधारमा १० प्रतिशतभन्दा कम क्षेत्रमा वर्षा हुने अवस्थालाई ‘एक–दुई स्थान’, १०–३० प्रतिशतलाई ‘थोरै स्थान’, ३०–५० प्रतिशतलाई ‘केही स्थान’, ५०–८० प्रतिशतलाई ‘धेरै स्थान’ र ८० प्रतिशतभन्दा बढीलाई ‘अधिकांश स्थान’मा वर्षा हुने सम्भावना भनेर बुझिन्छ ।