एमालेभित्र नेतृत्व विवाद चर्कियो, सचिवालयमै अल्पमतमा परे अध्यक्ष ओली

काठमाण्डौं । नेकपा एमालेको सचिवालय बैठकमा अध्यक्ष केपी शर्मा ओली माथि पार्टीभित्रैबाट दबाब बढ्दै गएको छ ।  

पछिल्लो बैठकका छलफलहरूले एमालेको आन्तरिक शक्ति सन्तुलनमा परिवर्तनको संकेत दिएको नेताहरूले बताएका छन् ।

शनिबार बसेको सचिवालय बैठकमा महासचिव शंकर पोखरेल र उपमहासचिव योगेश भट्टराई ले समेत अध्यक्ष ओलीको नेतृत्व शैली र कार्यसम्पादनबारे पुनर्विचार आवश्यक रहेको धारणा राखेपछि पार्टीभित्र वैकल्पिक सोच बलियो बन्दै गएको देखिएको हो ।

बैठकमा सहभागी १५ पदाधिकारीमध्ये ओलीको पक्षमा स्पष्ट रूपमा उभिनेमा उपाध्यक्ष रामबहादुर थापा ‘बादल’ र सचिव महेश बस्नेत मात्र देखिएको दाबी नेताहरूले गरेका छन् ।  

बाँकी अधिकांश पदाधिकारीले पार्टी पुनर्गठन र नेतृत्व संरचनामा परिवर्तन आवश्यक रहेको संकेत गरेको बताइएको छ ।

महासचिव पोखरेलले बैठकमा पार्टीलाई गतिशील बनाउन नेतृत्वले आवश्यक कदम चाल्नुपर्ने भन्दै “यथास्थितिमा पार्टी अघि बढ्न सक्दैन” भन्ने सन्देश दिएका थिए ।  

यसलाई सचिवालयभित्र नेतृत्व परिवर्तनसम्बन्धी बहस अझै गहिरिँदै गएको संकेतका रूपमा हेरिएको छ ।

आइतबारको बैठकमा शेरधन राई, भानुभक्त ढकाल, राजन भट्टराई र खगराज अधिकारीले पनि आ–आफ्ना धारणा राख्ने कार्यसूची तय गरिएको छ ।

यसअघि बोलेका अधिकांश पदाधिकारीहरूले नेतृत्व सुधार वा पुनर्संरचनाको पक्षमा सुझाव दिएको स्रोतहरूको भनाइ छ ।

एमालेको १९ सदस्यीय सचिवालयमा देखिएको पछिल्लो मतभेदले पार्टी नेतृत्व र आगामी रणनीतिबारे गम्भीर बहस शुरु भएको छ ।  

तेस्रो कार्यकालका लागि अध्यक्ष बनेका ओलीमाथि अहिले कार्यशैली सुधार वा नेतृत्व हस्तान्तरणको दबाब बढ्दै गएको देखिन्छ ।

यता ओली पक्षका नेताहरूले भने संकटको अवस्थामा नेतृत्व कमजोर बनाउने प्रयास भइरहेको टिप्पणी गर्दै पार्टी एकता र स्थिरता कायम राख्नुपर्ने तर्क प्रस्तुत गरिरहेका छन् ।  

तर, सचिवालयभित्रको पछिल्लो बहसले एमालेभित्र शक्ति सन्तुलन परिवर्तनतर्फ उन्मुख भएको संकेत गरेको छ ।