प्रतिनिधिसभा बैठक आज ११ बजे, चार विधेयकमाथि छलफल हुने

काठमाण्डौं । प्रतिनिधिसभाको बैठक मङ्गलबार बिहान ११ बजे बस्ने भएको छ ।  

सङ्घीय संसद् सचिवालयले तय गरेको सम्भावित कार्यसूचीअनुसार बैठकमा पर्यटन, विधि विज्ञान तथा निर्वाचनसम्बन्धी विभिन्न विधेयकमाथि छलफल र आवश्यक प्रस्तावहरू प्रस्तुत गरिनेछन् ।

बैठकमा संस्कृति, पर्यटन तथा नागरिक उड्डयनमन्त्री खडकराज पौडेलले ‘पर्यटन विधेयक, २०८१’ माथि सैद्धान्तिक छलफलका लागि विचार गरियोस् भन्ने प्रस्ताव सदनमा राख्ने कार्यक्रम रहेको छ ।  

सरकारले पर्यटन क्षेत्रको कानुनी संरचना अद्यावधिक गर्ने उद्देश्यले ल्याएको उक्त विधेयकमाथि प्रारम्भिक बहस हुने अपेक्षा गरिएको छ ।

त्यस्तै, प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिलामन्त्री सोविता गौतमले ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ लाई विस्तृत अध्ययन तथा दफाबार छलफलका लागि सम्बन्धित समितिमा पठाउने प्रस्ताव प्रस्तुत गर्ने सम्भावित कार्यसूची रहेको संसद् सचिवालयले जनाएको छ ।

 

संसद् बैठकमा निर्वाचन कानुनसँग सम्बन्धित दुई महत्वपूर्ण संशोधन विधेयकलाई पनि प्राथमिकताका साथ अघि बढाइने भएको छ ।

‘प्रतिनिधिसभा सदस्य निर्वाचन (पहिलो संशोधन) विधेयक, २०८३’ र ‘मतदाता नामावली (पहिलो संशोधन) विधेयक, २०८३’ माथि दफाबार छलफल गरी पारित गरियोस् भन्ने प्रस्ताव बैठकमा पेश हुने कार्यसूचीमा समावेश गरिएको छ ।

मङ्गलबारको प्रतिनिधिसभा बैठकमा विशेषगरी पर्यटन क्षेत्र सुधार, विधि विज्ञान पूर्वाधार विकास तथा निर्वाचन व्यवस्थासँग सम्बन्धित कानूनी प्रावधानबारे बहस केन्द्रित हुने देखिएको छ ।  

संसद् सचिवालयका अनुसार बैठकका एजेन्डाले आगामी नीतिगत र कानूनी प्रक्रियामा महत्वपूर्ण प्रभाव पार्न सक्ने अपेक्षा गरिएको छ ।