युरोपेली मुलुकका कूटनीतिज्ञसँग प्रधानमन्त्री शाहको सामूहिक भेट

काठमाण्डौं । बालेन्द्र शाहले मंगलबार युरोपेली संघ (ईयू) आबद्ध मुलुकका गैरआवासीय राजदूत तथा मिसन प्रमुखहरूसँग उच्चस्तरीय कूटनीतिक संवाद गरेका छन् ।  

प्रधानमन्त्री सचिवालयका अनुसार भेटवार्ता नेपाल–ईयू सम्बन्धलाई थप सक्रिय र परिणाममुखी बनाउने विषयमा केन्द्रित थियो ।

छलफलमा युरोपेली संघ सम्बद्ध विभिन्न देशका कूटनीतिक प्रतिनिधिहरू सहभागी थिए ।  

विकास साझेदारी, विदेशी लगानी, हरित ऊर्जा, जलवायु परिवर्तन, सुशासन तथा आर्थिक सहकार्यका क्षेत्रमा सहकार्य विस्तार गर्ने विषयमा कुराकानी भएको जनाइएको छ ।

प्रधानमन्त्री शाहले नेपाल आर्थिक सुधार, पूर्वाधार विकास र अन्तर्राष्ट्रिय सहकार्यलाई प्राथमिकतामा राखेर अघि बढिरहेको सन्देश दिएको सचिवालयले जनाएको छ ।  

उनले नेपालसँगको साझेदारीलाई थप प्रभावकारी बनाउन सरकार सकारात्मक रहेको धारणा राखेका थिए ।

कूटनीतिक वृत्तमा यो भेटलाई नेपालप्रति युरोपेली मुलुकहरूको बढ्दो चासो र नयाँ सरकारसँग प्रत्यक्ष संवाद विस्तारको संकेतका रूपमा हेरिएको छ ।  

पछिल्लो समय नेपालमा लगानी, ऊर्जा, पर्यटन र जलवायु सहकार्यमा युरोपेली संघको सक्रियता बढ्दै गएको छ ।

यसअघि पनि प्रधानमन्त्री शाहले नेपालस्थित विभिन्न देशका राजदूत तथा कूटनीतिक नियोग प्रमुखहरूसँग सामूहिक संवाद गर्दै अन्तर्राष्ट्रिय सम्बन्धलाई सक्रिय बनाउने प्रयास गरेका थिए ।

 नेपालको नयाँ राजनीतिक तथा आर्थिक प्राथमिकताबारे अन्तर्राष्ट्रिय समुदायसँग प्रत्यक्ष संवादलाई सरकारले महत्व दिइरहेको विश्लेषण गरिएको छ ।