संविधान संशोधन कार्यदलप्रति असन्तुष्ट एमाले, प्रतिनिधि फिर्ता बोलायो

काठमाण्डौ । नेकपा एमालेले संविधान संशोधन बहसपत्र कार्यदलबाट आफ्नो प्रतिनिधि फिर्ता बोलाएको छ ।

एमाले महासचिव शङ्कर पोखरेलले बिहीबार कार्यदल संयोजक असिम शाहलाई पत्र पठाउँदै पार्टीका तर्फबाट कार्यदल सदस्य रहेका डा. भीष्म अधिकारीलाई फिर्ता बोलाइएको जानकारी गराएका हुन् । 

एमालेका अनुसार कार्यदलको काम कारबाही सुरुदेखि नै शंकास्पद प्रकृतिको रहेको, संविधान संशोधनका विषयहरू स्पष्ट रूपमा किटान नगरिएको र वर्तमान संविधानका आधारभूत संरचनाप्रति सरकारको दृष्टिकोण प्रस्ट नभएको कारण प्रतिनिधि फिर्ता बोलाइएको हो ।

कार्यदलको सुरुका बैठकमा डा. अधिकारी सहभागी भए पनि पछिल्ला दिनमा भने सहभागी हुन छाडेका थिए । एमालेले संशोधनका लागि बहसमा ल्याइएका केही विषयहरू संघीय लोकतान्त्रिक गणतन्त्रकै मर्मविपरीत देखिएको भन्दै यसबारे सरकारको स्पष्ट धारणा माग गर्दै आएको जनाएको छ ।

एमालेले वर्तमान संविधानका आधारभूत पक्षलाई अझ सुदृढ बनाउने र विगतमा देखिएका नकारात्मक अभ्यास तथा कमजोरीलाई सुधार गर्ने उद्देश्यले संविधान संशोधन गर्नुपर्ने पक्षमा आफू दृढ रहेको स्पष्ट पारेको छ । तर, संविधानका आधारभूत विषयहरू नै खल्बल्याउने उद्देश्य कार्यदलमा देखिएको एमालेको आरोप छ ।

‘आजका दिनसम्म पनि हाम्रो पार्टीको प्रस्तावअनुसार सरकारका तर्फबाट कुनै स्पष्ट जवाफ नआएको सन्दर्भमा औपचारिक रूपमा पार्टी प्रतिनिधिलाई फिर्ता बोलाइएको जानकारी गराउँदछु,’ महासचिव पोखरेलले पठाएको पत्रमा उल्लेख छ ।