दुई जनाको जीवित उद्धारपछि त्रिशूली–३ ‘ए’ सुरुङ छानबिन, थप कोही भेटिएनन्

NEWS
शुक्रबार, भाद्र १९,२०८३ 17:51:00

काठमाण्डौ । माथिल्लो त्रिशूली–३ ‘ए’ जलविद्युत् आयोजनाको सुरुङबाट १० दिनपछि दुई जनालाई जीवितै उद्धार गरिएपछि गरिएको थप खोजीमा शुक्रबार साँझसम्म अरू कुनै व्यक्ति फेला परेका छैनन्।

जियोटेक्निकल इन्जिनियर उदयराज न्यौपानेसहितको टोलीले सुरुङका पहुँचयोग्य विभिन्न भागमा पुगेर खोजी गरेको थियो। न्यौपानेका अनुसार पहिलो चरणको विस्तृत खोजीका क्रममा जीवित वा मृत अवस्थामा थप कोही भेटिएनन्।

उनी स्वयं पनि सुरुङभित्र प्रवेश गरेर खोजीमा सहभागी भएका थिए।

शुक्रबार बिहान सुरुङबाट सञ्जय साह र कबिर महर्जनलाई जीवितै उद्धार गरिएको थियो। साह फोरम्यान र महर्जन सुपरभाइजरका रूपमा कार्यरत थिए।

दुवैलाई सुरुङबाट निकालेलगत्तै हेलिकप्टरमार्फत काठमाडौं ल्याइएको थियो। उनीहरूको नेपाली सेनाको छाउनीस्थित अस्पतालमा उपचार भइरहेको छ।

दुई जनाको सफल उद्धारपछि सुरुङभित्र थप मानिस हुनसक्ने सम्भावनालाई ध्यानमा राखेर खोजीको दायरा बढाइएको थियो। नेपाल विद्युत् प्राधिकरणका इलेक्ट्रिकल सुपरभाइजर संजोग केसीसहित नेपाली सेना, सशस्त्र प्रहरी र प्राविधिक टोली पावरहाउस तथा सुरुङको भित्री भागमा पुगेको थियो।

उद्धारपछि साहले सुरुङभित्र अन्य व्यक्ति पनि हुनसक्ने बताएका थिए। त्यसपछि उद्धार टोलीले सुरुङका सम्भावित क्षेत्रलाई प्राथमिकतामा राखेर खोजी गरेको हो।

तर शुक्रबार साँझसम्म गरिएको खोजीमा थप व्यक्तिको उपस्थिति पुष्टि हुन सकेको छैन।

यद्यपि, उद्धार टोलीले यसलाई खोजी समाप्त भएको निष्कर्षका रूपमा लिएको छैन। पहुँच कठिन क्षेत्र, भूमिगत संरचनाका अन्य भाग तथा बाढीले प्रभावित बनाएका सम्भावित स्थानमा अझै खोजी आवश्यक देखिएको छ।

भदौ १० गते भोटेकोशीमा आएको विनाशकारी बाढीले त्रिशूली–३ ‘ए’ आयोजनाको पावरहाउस र सुरुङ क्षेत्रमा व्यापक क्षति पुर्‍याएको थियो। त्यसपछि त्यहाँ कार्यरत केही कर्मचारी तथा प्राविधिक सम्पर्कविहीन भएका थिए।

बाढीले सुरुङको प्रवेश क्षेत्र ढुंगा, लेदो र भग्नावशेषले अवरुद्ध गरेपछि खोज तथा उद्धार जटिल बनेको थियो।

१० दिनपछि दुई जनाको जीवित उद्धारले आशा जगाए पनि थप खोजीमा अरू कोही नभेटिएपछि अब उद्धार टोलीको ध्यान अन्य सम्भावित स्थान र भूमिगत संरचनातर्फ मोडिएको छ।