खराब कर्जाको प्रभिजनले नेपाल इन्भेष्टमेन्ट मेगा बैंकको नाफा प्रभावित, इपीएस रु. १७.१६

काठमाण्डौ । नेपाल इन्भेष्टमेन्ट मेगा बैंक लिमीटेडले चालु आर्थिक वर्षको पहिलो त्रैमाससम्ममा १ अर्ब ४६ करोड खूद नाफा आर्जन गरेको छ । यो भनेको अघिल्लो आर्थिक वर्षको सोही अवधिको तुलनामा ३.८२ प्रतिशतले कम हो ।  

समीक्षा अवधिमा कम्पनीको वितरणयोग्य नाफा २ अर्ब ५१ करोडले ऋणात्मक छ। 

यस्तै, कम्पनीको अघिल्लो वर्षको यही अवधिसम्म २ अर्ब १८ करोड रहेको सञ्चालन नाफा घटेर २ अर्ब ९ करोडमा सीमित भएको छ भने खूद ब्याज आम्दानी पनि ६.८३ प्रतिशतले घटेर ४ अर्ब १६ करोडबाट ३ अर्ब ८७ करोड भएको छ ।  

अघिल्लो वर्षको तुलनामा रिजर्भको आकारलाई २.३७ प्रतिशतले बढाएको यो बैंकको खराब कर्जा बढ्दा र त्यसका लागि कमाएको नाफा प्रभिजन गर्नुपर्दा महत्वपूर्ण सूचकमा नकारात्मक प्रभाव देखिएको छ । प्रभिजनमा राखिएको पैसा लोनको रिकभरि भएपछि नाफाकै रुपमा आउने भएका कारण तत्कालका लागि मुख्य सूचकमा निराशाजनक अवस्था देखिए पनि भविष्यका लागि भने उति नराम्रो होइन । 

अघिल्लो वर्ष ४.८३ प्रतिशतमा सीमित खराब कर्जाको अनुपात बढेर ५.८४ प्रतिशत पुगेको छ । यसकै कारण बैंकले अघिल्लो वर्षको तुलनामा इम्पेयरमेन्ट चार्जको रुपमा ५२.२१ प्रतिशतले बढाएर नाफा प्रभिजनमा राख्नुपरेको छ । जस्तो, अघिल्लो वर्षको पहिलो त्रैमाससम्ममा इम्पेयरमेन्ट चार्जको रुपमा ६४ करोड छुट्याएकोमा यो वर्ष ९७ करोड ५१ लाख बढी विनियोजन गर्नुपरेको छ ।  

समीक्षा अवधिमा बैंकको वार्षिकीकृत प्रतिसेयर आम्दानी १७.१६ रुपैयाँ, प्रतिसेयर नेटवर्थ १८४.३३ रुपैयाँ र पीई रेसियो १४.८० गुणा कायम भएको छ।