घोराही सिमेन्टको घाटा १५८% ले चुलियो, ईपीएस ११.२५ रुपैयाँले ऋणात्मक

काठमाण्डौ । घोराही सिमेन्ट इण्डष्ट्री लिमिटेडको घाटा झनै बढेको छ । कम्पनीले सार्वजनिक गरेको चालु आवको पहिलो त्रैमाससम्मको वित्तीय विवरणअनुसार कम्पनीले चालु आवको पहिलो त्रैमाससम्म ५१ करोड ३७ लाख रुपैयाँ खुद घाटा व्यहोरेको छ ।  

यो घाटा अघिल्लो आवको सोही अवधिको तुलनामा १५८.४० प्रतिशतले बढी हो । अघिल्लो आवको पहिलो त्रैमाससम्म भने कम्पनीको घाटा १९ करोड ८८ लाख रुपैयाँ रहेको थियो ।  

कम्पनीले यो अवधिमा बिक्रीमार्फत ६६ करोड ८४ लाख रुपैयाँ आर्जन गरेको छ । जुन अघिल्लो आवको सोही अवधिको तुलनामा २४.७९ प्रतिशतले कम हो । अघिल्लो आवको सोही अवधिसम्म कम्पनीले ८८ करोड ८८ लाख रुपैयाँ आम्दानी गरेको थियो । कम्पनीले यो अवधिसम्म २ लाख ५८ हजार रुपैयाँबराबरको अन्य आम्दानी गरेको छ ।  

त्यस्तै कम्पनीको प्रशासनिक,बिक्री तथा वितरण खर्च ४ करोड ९९ लाख रुपैयाँ, ह्रासकट्टी खर्च १७ करोड १६ लाख र वित्त खर्च २५ करोड २४ लाख रुपैयाँबराबर रहेको छ । सिमेन्ट उद्योगमा मागभन्दा बढी उत्पादन भएकाले प्रतिस्पर्धातक अवस्थामा बिक्रीमा अपेक्षाकृत वृद्धि नभएकाले कम्पनीको आम्दानी घटेसँगै कम्पनी घाटामा गएको देखिन्छ । 

यस्तै यस अवधिको युनिट १ को ब्याज खर्च सो युनिटले उत्पादन गरिसकेकाले आयकर ऐन बमोजिम ब्याज खर्चमा मात्र लेखांकन गरिएको साथै सो युनिटको ह्रास खर्चलाई नाफा÷नोक्सानमा लेख्नुपर्ने प्रावधान रहेकाले जम्मा नोक्सानी बढ्न गएको कम्पनीले जनाएको छ ।  

कम्पनीको रिटेन्ड अर्निङ ३ अर्ब ८० करोडबाट घटेर १ अर्ब ६७ करोडमा सीमित बनेको छ । कम्पनीको अन्य रिजर्भ ७ करोड ९० लाख र सेयर प्रिमियम २ अर्ब ६५ करोड रुपैयाँ रहेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस) ११.२५ रुपैयाँ ऋणात्मक,प्रतिसेयर नेटवर्थ १९६.६३ रुपैयाँ,प्रतिसेयर कुल सम्पत्तिको मूल्य ५१०.२३ रुपैयाँ र तरलता अनुपात ०.७८ प्रतिशत कायम भएको छ ।