जागरणसभामा एमाले कार्यकर्ताले फोहोर गरे, बालेनले गराए १ लाख जरीवाना

काठमाण्डौ । सत्ता गठबन्धनको नेतृत्व गरिरहेको नेकपा एमालेका कार्यकर्ताले शहर फोहोर गरेको भन्दै काठमाण्डौ महानगरपालिकाले १ लाख जरीवाना गराएको छ ।  

एमालेले दरबारमार्गमा शुक्रबार शक्ति प्रदर्शनका लागि आमसभा गरेको थियो । जागरण सभाको नाम दिइएको कार्यक्रमका क्रममा सडक, सडकपेटी र आसपास जथाभावी फोहोरमैला गरी वातावरण प्रदूषण गरेको भन्दै मेयर बालेन शाहको निर्देशनमा महानगरले १ लाख रुपैयाँ जरीवाना गराएको हो । 

महानगरले एमाले पार्टी कार्यालयको नाममा पठाएको पत्रमा भनिएको छ,‘प्रस्तुत विषयमा मिति २०८१ मंसिर ७ गते काठमाडौँ महानगरपालिका वडा नं.१ दरबारमार्गस्थित खुला सडकमा जागरण सभा गर्ने क्रममा सडक तथा सडकपेटीमा जथाभाबी फोहरमैला गरी वातावरण प्रदूषण गरेकोले तपाईँलाई फोहरमैला व्यवस्थापन ऐन, २०६८ र काठमाडौँ महानगरपालिकाको आर्थिक ऐन, २०८१ बमोजिम रु.१००,०००(अक्षरुपी एक लाख) जरिवाना गरिएको ब्यहोरा निर्देशानुसार अनुरोध गर्दछु ।’

पत्रमा महानगरका प्रहरी निरीक्षक लिलाराज गाछाको हस्ताक्षर रहेको छ ।  

पछिल्लो समय विभिन्न विषयहरुमा एमाले अध्यक्ष समेत रहेका प्रधानमन्त्री केपी शर्मा ओली र काठमाण्डौ महानगरपालिकाका मेयर बालेन्द्र शाह(बालेन शाह)बीच आरोपप्रत्यारोप चल्दै आएको छ । दुवैले एकअर्काविरुद्ध सामाजिक सञ्जालमार्फत कटू आलोचना गर्दै आएका छन् ।