प्रभिजन र लाभांशमा कडाई गरेर बैंकहरु बचाएको गभर्नरको तर्क, 'अबका दिन राम्रो हुनेछन्'

काठमाण्डौ । नेपाल राष्ट्रबैंकका गभर्नर महाप्रसाद अधिकारीले बैंकहरुको प्रभिजनलाई बढाएर लाभांशमा कडाई गरी तिनै संस्थाहरुलाई बचाउने काम भएको तर्क गरेका छन् ।  

नेपाल बैंकर्स एशोसिएसन(एनबीए)को ३८ औं वार्षिक साधारणसभालाई बुधबार काठमाण्डौमा सम्बोधन गर्दै गभर्नर अधिकारीले त्यस्तो तर्क पेश गरेका हुन् । उनले बैंकहरुलाइ नै जोगाउन चालिएको कतिपय कदमको विषयमा अपव्याख्या भएकोमा असन्तुष्टि व्यक्त गरे । 

उनले कतिपय बैंकहरुको अवस्था हेरेर लाभांशमा कडाई गरिएको र त्यसले तिनै संस्थाहरुलाई बलियो बनाउने बचाउने काम गरेको उल्लेख गर्दै सम्पूर्ण रुपमा लाभांश नै खान भने नरोकेको प्रष्ट पारे ।  

उनले अबका दिनमा व्यापार व्यवसायमा राम्रो हुने दाबी गर्दै त्यसले बैंकहरुलाई पनि राम्रो  गर्ने बताए । 'अबका दिनमा बैंकहरुका लागि पनि सहज हुँदै जाने अनुमान गर्न सकिन्छ ।' उनले भने-'बैंकहरुले कमाएको नाफाको ठूलो हिस्सा प्रभिजनमा राखेका छन् । त्यो पैसा बैंकहरुको आफ्नै हो, भोलिको दिनमा बाँड्न मिलिहाल्छ । त्यसकारण तपाईहरुले निराश भइहाल्नुपर्ने अवस्था छैन ।'  

उनले केन्द्रीय बैंकले लिने नीतिहरुको कार्यान्वयनमा सहयोग गरी बैंकिंग सिस्टमलाई जोगाउन सबै बैंकरहरुले सहयोग गर्नुपर्नेमा समेत जोड दिए ।

 उनले कोभिड प्रभावबाट निस्किनु आफूहरुको ठूलो उपलब्धि भएको समेत दाबी गर्न भ्याए । केन्द्रीय बैंकले वित्तीय स्थायीत्वलाई केन्द्रमा राखेर नीतिहरु अंगिकार गर्ने भन्दै धेरै छिटो छिटो नीतिगत परिवर्तनको आशा गर्न नहुने समेत बताए । 

उनले पछिल्लो समय बैंकिंग क्षेत्र साइबर आक्रमणको जोखिममा रहेको भन्दै बैंकरहरुलाई सचेत गराएका थिए ।  

सोही अवसरमा बैंकबाट लिएको ऋण नतिरे पनि हुन्छ भन्ने भाष्य निर्माण गर्न कतिपय तत्वहरु अझै सक्रिय रहेकोले यसलाई चिरेर अगाडि बढ्नुपर्नेमा समेत जोड दिए ।