इम्पेयरमेन्ट चार्ज बढ्दा सिटिजन्स बैंकको नाफा १५.४५% ले घट्यो

काठमाण्डो । सिटिजन्स बैंक इन्टरनेशनल लिमिटेडले चालु आवको दोस्रो त्रैमाससम्म ६६ करोड १८ लाख रुपैयाँ खुद नाफा आर्जन गरेको छ । बैंकले आर्जन गरेको यो नाफा अघिल्लो आवको तुलनामा १५.४५ प्रतिशतले कम हो ।  

अघिल्लो आवको दोस्रो त्रैमाससम्म बैंकले ७८ करोड २७ लाख रुपैयाँ खुद नाफा आर्जन गरेको थियो । चालु आवको समीक्षा अवधिमा बैंकको खुद ब्याज आम्दानी भने बढेको छ । खुद ब्याज आम्दानी ८.२६ प्रतिशतले बढेर ३ अर्ब ७ करोड रुपैयाँ पुगेको छ ।  

यद्यपी बैंकको खुद सञ्चालन आम्दानी भने २.३२ प्रतिशतले घट्दै २ अर्ब ५४ करोड रुपैयाँमा सीमित बनेको छ । बैंकको रिटेन्ड अर्निङ ६१ करोड ३२ लाख रुपैयाँबाट बढेर ७० करोड ९४ लाख रुपैयाँ पुगेको छ । रिजर्भको आकार भने ६ अर्ब ७६ करोड रुपैयाँबाट घटेर ६ अर्ब ६० करोड रुपैयाँमा झरेको छ ।  

१ खर्ब ८८ अर्ब रुपैयाँबराबरको निक्षेप संलकन गरेको बैंकले १ खर्ब ५३ अर्ब रुपैयाँबराबरको कर्जा प्रवाह गरेको छ । बैंकको चुक्तापूँजी १४ अर्ब २० करोड रुपैयाँ रहेको छ ।  

यो अवधिमा बैंकको इम्पेयरमेन्ट चार्ज भने बढेको छ । अघिल्लो आवमा ८५ करोड ९५ लाख रुपैयाँ रहेको इम्पेयरमेन्ट चार्ज बढेर १ अर्ब ३८ करोड रुपैयाँ पुगेको छ । अघिल्लो आवको दोस्रो त्रैमाससम्म २१ करोड ३० लाख रुपैयाँ ऋणात्मक रहेको बैंकको वितरणयोग्य मुनाफा १५ करोड ८१ लाख रुपैयाँले धनात्मक बनेको छ । बैंकको वार्षिक वितरणयोग्य प्रतिसेयर आम्दानी २.३५ रुपैयाँ रहेको छ ।  

समीक्षा अवधिसम्म बैंकको प्रतिसेयर आम्दानी(ईपीएस)८.९६ रुपैयाँ, प्रतिसेयर कुल सम्पत्तिको मूल्य १ हजार ५४३.४५ रुपैयाँ, प्रतिसेयर नेटवर्थ १५०.३९ रुपैयाँ,तरलता अनुपात २४.९० प्रतिशत र मूल्य आम्दानी अनुपात २३.५३ गुणा कायम भएको छ ।