राधि विद्युतले डाक्यो विशेष साधारण सभा, यस्ता छन् प्रस्ताव

काठमाण्डौ । राधि विद्युत कम्पनी लिमिटेडले आगामी चैत ३ गते विशेष साधारण सभा आयोजना गर्ने भएको छ । कम्पनीको फागुन १६ गते बसेको सञ्चालक समितिको बैठकले ललितपुरको चापागाउँमा रहेको वेलकम पार्टी प्यालेसमा बिहान ८ बजेदेखि सभा आयोजना गर्ने निर्णय गरेको हो ।  

उक्त सभामा हकप्रद सेयर निष्कासनपश्चात कायम हुने चुक्ताबराबर हुने गरी जारी पूँजी संशोधनसहित कम्पनीको प्रबन्धपत्र तथा नियमावली संशोधन गर्नेर नियामक निकायहरुको निर्देशन बमोजिम कम्पनीको प्रबन्धपत्र तथा नियमावलीका प्रस्तावित संशोधनहरुमा परिमार्जन तथा थपघट गर्न आवश्यक भएमा सो गर्न सञ्चालक समितिलाई अख्तियारी प्रदान गर्ने विशेष प्रस्ताव पारित गरिनेछ ।  

सभामा २ जना सञ्चालकको नियुक्ती गर्ने र स्वतन्त्र सञ्चालकको नियुक्ती अनुमोदन गर्ने प्रस्ताव समेत पारित हुनेछ ।  

विशेष साधारण सभा प्रयोजनका लागि कम्पनीले फागुन २५ गते एक दिनका लागि बुक क्लोज गर्ने निर्णय गरेको छ । यसर्थ फागुन २४ गतेसम्म नेप्सेमा कारोबार भई कायम भएका सेयरधनीहरु मात्रै कम्पनीको उक्त सभामा सहभागी हुन योग्य हुनेछन् ।