एनएमबि बैंकको सीईओ बने गोविन्द घिमिरे, सुदेश उपाध्यायलाई सिनियर डिसीईओको जिम्मेवारी

काठमाण्डौ । एनएमबि बैंकले प्रमुख कार्यकारी अधिकृतको रुपमा गोविन्द घिमिरेलाई नियुक्त गरेको छ ।  

शुक्रबार बसेको बैंकको सञ्चालक समितिको बैठकले एनएमबि बैंकमा वरिष्ठ नायव प्रमुख कार्यकारी अधिकृतको रुपमा कार्यरत घिमिरेलाई आगामी ४ वर्षका लागि प्रमुख कार्यकारी अधिकृतको रुपमा नियुक्त गरेको हो । 

हालका प्रमुख कार्यकारी अधिकृत सुनिल केसी २ कार्यकाल पूरा गरेर फागुन अन्तिमबाट विदा हुँदैछन् । रिक्त हुन लागेको प्रमुख कार्यकारी अधिकृत पदको रुपमा चैतबाट घिमिरेले कमान सम्हाल्ने छन् ।  

घिमिरे एनएमबि बैंककै क्याडर हुन् । सन् १९९५ मा नेपाल बंगलादेश बैंकबाट बैंकिङ करिअर सुरु गरेका घिमिरे एनएमबि बैंकमा सन् २००९ देखि निरन्तर आबद्ध छन् । २०७९ असोजदेखि उनी एनएमबि बैंकको नायव प्रमुख कार्यकारी अधिकृतको रुपमा नियुक्त भएका थिए । घिमिरेले त्रिभुवन विश्वविद्यालयबाट एमबीएस र कानुनमा स्नातकसम्मको शिक्षा हासिल गरेका छन् ।

घिमिरे सीईओ बनेसँगै सञ्चालक समितिको बैठकले बैंकका नायव प्रमुख कार्यकारी अधिकृत सुदेश उपाध्यायलाई वरिष्ठ नायव प्रमुख कार्यकारी अधिकृत बनाएको छ । उपाध्याय चाहिँ विगत एक दशकदेखि एनएमिब बैंकमा कार्यरत छन् । उनी सन् २०१५ मा एनएमबि बैंकको सिनियर म्यानेजरको रुपमा भित्रिएका थिए । सन् १९९८ मा स्टान्डर्ड चाटर्ड बैंक नेपाल (तत्कालीन नेपाल ग्रिनलेज बैंक)बाट बैंकिङ करिअर थालेका थिए । उनीसँग स्ट्याण्डर्ड चार्टर्ड बैंक कतार तथा कतारकै मश्रेक बैंकमा काम गरेको अनुभव समेत छ । उनी त्रिभुवन विश्वाविद्यालयका एमबीए ग्राजुएट हुन् ।