सेयरबजार २७.८२% ले बढ्यो, धितोपत्र बजार पूँजीकरण रु.४४.५८ खर्ब

काठमाण्डौ । धितोपत्र बजार पूँजीकरण ३४.९९ प्रतिशतले बढेको छ । चालु आवको ७ महिनासम्ममा धितोपत्र बजार पूँजीकरण ४४ खर्ब ५८ अर्ब ५२ करोड रुपैयाँ कायम भएको छ ।  

गत आवको सोही अवधिसम्म धितोपत्र बजार पूँजीकरण ३३ खर्ब २ अर्ब ८४ करोड रुपैयाँ थियो । नेप्सेमा सूचीकृत सेयर संख्या थपिनु सूचीकृत कम्पनीको सेयरभाउ बढ्दै जाँदा गत आवको तुलनामा बजार पूँजीकरण वृद्धि भएको हो ।  

२०८० माघ मसान्तमा २१०१.१६ रहेको नेप्से सूचकाङ्क २०८१ माघ मसान्तमा २६८५.७३ कायम भएको छ । यो हिसाबमा सेयरबजार  गत वर्षको तुलनामा २७.८२ प्रतिशतले बृद्धि भएको छ ।  

सो अवधिसम्म नेपाल नेप्सेमाा सूचीकृत कम्पनीहरूको संख्या २६८ पुगेको छ । सूचीकृत कम्पनीहरुमध्ये १३० बैंक तथा वित्तीय संस्था र बीमा कम्पनी रहेका छन् भने ९१ जलविद्युत कम्पनी, २२ उत्पादन तथा प्रशोधन उद्योग, ७ होटल, ७ लगानी कम्पनी, ४ व्यापारिक संस्था र ७ अन्य समूहका रहेका छन् । २०८० माघमा सूचीकृत कम्पनीहरूको संख्या २७१ रहेको थियो ।  

सूचीकृत कम्पनीहरूमध्ये बैंक तथा वित्तीय संस्था र बीमा कम्पनीको धितोपत्र बजार पूँजीकरणको हिस्सा ५३.३ प्रतिशत रहेको छ । त्यसैगरी, जलविद्युत कम्पनीको हिस्सा १६.७ प्रतिशत, लगानी कम्पनीको हिस्सा ७.६ प्रतिशत, व्यापारिक संस्थाको हिस्सा ५.४ प्रतिशत, उत्पादन तथा प्रशोधन उद्योगको हिस्सा ५.३ प्रतिशत, होटेलको हिस्सा २.७ प्रतिशत तथा अन्य समूहका कम्पनीहरुको हिस्सा ९ प्रतिशत रहेको छ ।