राधि विद्युतको विशेष साधारण सभा स्थगित

काठमाण्डौ । राधि विद्युत कम्पनी लिमिटेडको विशेष साधारण सभा स्थगित भएको छ । चैत ३ गते आयोजना हुने तय भएको कम्पनीको विशेष साधारण सभा गणपूरक संख्या नपुगेकाले स्थगित भएको हो ।  

कम्पनीको गत फागुन १६ गते बसेको सञ्चालक समितिको बैठकले ललितपुरको चापागाउँमा रहेको वेलकम पार्टी प्यालेसमा बिहान ८ बजेदेखि सभा डाकेको थियो ।  

उक्त सभामा हकप्रद सेयर निष्कासनपश्चात कायम हुने चुक्ताबराबर हुने गरी जारी पूँजी संशोधनसहित कम्पनीको प्रबन्धपत्र तथा नियमावली संशोधन गर्नेर नियामक निकायहरुको निर्देशन बमोजिम कम्पनीको प्रबन्धपत्र तथा नियमावलीका प्रस्तावित संशोधनहरुमा परिमार्जन तथा थपघट गर्न आवश्यक भएमा सो गर्न सञ्चालक समितिलाई अख्तियारी प्रदान गर्ने विशेष प्रस्ताव प्रस्तुत गर्ने कार्यसूची रहेको थियो ।  

सभामा २ जना सञ्चालकको नियुक्ती गर्ने र स्वतन्त्र सञ्चालकको नियुक्ती अनुमोदन गर्ने प्रस्ताव समेत समावेश थियो ।  

विशेष साधारण सभा प्रयोजनका लागि कम्पनीले गत फागुन २५ गते एक दिनका लागि बुक क्लोज गरेको थियो ।