एलन मस्कको ग्रोक एआईविरुद्ध भारत सरकारको कदम, गाली गलौजयुक्त भाषाको प्रयोगको विषयमा प्रश्न

काठमाण्डौ । एलन मस्कको ‘ग्रोक एआई’ यतिबेला चर्चामा रहेको छ । यसैबीच भारत सरकारले गाली गलौजयुक्त भाषा प्रयोग गरेको विषयमा कम्पनीलाई स्पष्टीकरण सोध्ने भएको छ ।  

रिपोर्टका अनुसार भारत सरकारको सूचना तथा प्रोद्योगिक मन्त्रालयले भड्काउपूर्ण भाषाको प्रयोगलाई लिएर एलन मस्कको एक्समा चिन्ता जाहेर गरेको छ । यस्तो भाषा प्रयोग भएको विषयमा छानविन गर्न समेत मन्त्रालयले माग गरेको छ ।  

तर यस विषयमा थप केही जानकारी पनि प्राप्त नभएको रिपोर्टमा जनाइएको छ ।  

ग्रोक एआइलाई एक्सएआई नामक कम्पनीले सन् २०२३ मा लञ्च गरेको थियो । हालै मात्रै कम्पनीले लेटेस्ट ग्रोक थ्रि लञ्च गरेको थियो । एलान मस्क ग्रोक एआईको सहायताले मेन्स्ट्रिम एआई मोडल्ुलाई उछिन्न चाहन्छन् । मस्कले च्याट जीपीटी र गूगल जेमीनीलाई समेत पछि छाड्ने योजना बनाएका छन् ।  

यो साताको सुरुवातमा इन्टरनेटमा एउटा पोष्ट भाईरल भएको थियो । जसमा एक व्यक्तिले एक्स प्लेटफर्ममा रहेको ग्रोक एआई च्याटबटको प्रयोग गरेर एउटा प्रश्न गरेका थिए । उक्त प्रश्नको जवाफमा एआईले हिन्दी भाषामा गाली गलौजयुक्त शब्द प्रयोग गरेको थियो । त्यसपश्चात अन्य प्रयोगकर्ताले पनि ग्रोक एआई च्याटबटको प्रयोग गरेर हेर्दा उस्तै गाली गलौजयुक्त जवाफ पाएका थिए ।