हिमालयन डिस्टिलरीको सञ्चालकमा प्रसाईं नियुक्त, अध्यक्ष सिंहको राजीनामा स्वीकृत

काठमाण्डौ । हिमालयन डिस्टिलरी लिमिटेडको सञ्चालकमा शिखर प्रसाईं नियुक्त भएका छन् । कम्पनीको चैत १७ गते बसेको सञ्चालक समितिको बैठकले रिक्त रहेको सञ्चालक पदमा प्रसाईंलाई नियुक्त गर्ने निर्णय गरेको हो ।  

उनलाई सोही मितिदेखि लागू हुनेगरी बाँकी कार्यकालका लागि उक्त पदमा नियुक्त गरिएको कम्पनीले जनाएको छ । यसअघिका सञ्चालक नरेन्द्र कुमार बस्न्यातको राजीनामा दिएपछि कम्पनीको सञ्चालक पद रिक्त थियो ।  

यस्तै, कम्पनीको चैत १७ गते नै बसेको सञ्चालक समितिको बैठकले कम्पनीका अध्यक्ष अखिलेश्वर प्रसाद सिंहको राजीनामा स्वीकृत गर्ने निर्णय समेत गरेको छ । आफ्नो स्वास्थ्यलाई कारण देखाउदै उनले दिएको राजीनामा सोही दिनदेखि लागू हुनेगरी स्वीकृत भएको हो ।