एनआईसी एशिया बैंकको एटीएमबाट कार्ड बिनै ई-सेवा वालेटको रकम निकाल्न सकिने

काठमाण्डौ । एनआईसी एशिया बैंकले देशभर रहेका आफ्ना एटीएमहरुबाट ई–सेवा वालेटमा रहेको रकम एटीएम कार्ड बिना नै निकाल्न मिल्ने सेवाको सुरुवात गरेको छ । बैंकले आफ्ना ग्राहकहरु तथा ई–सेवा वालेट प्रयोगकर्ताहरुलाई बैंकिङ कारोबार गर्न अझ बढी सरल र सहज होस् भन्ने उद्देश्यले यो सेवाको सुरुवात गरेको हो । 

यससँगै अब मुलकभर रहेका बैंकका ६७० एटीएमहरुबाट ई–सेवा वालेटमा रहेको रकम कुनै झन्झट बिनै सामान्य प्रकृयाबाट निकाल्न सकिनेछ ।

यसको निम्ती सबैभन्दा पहिला ई–सेवा एप लगिन गरेर Financial Payments अन्तर्गत रहेको ATMWithdrawal मा एनआईसी एशिया बैंक छनौट गर्नुपर्छ । अब दिएको निर्देशनअनुसार रु. १ हजार, रु. २ हजार, रु. ३ हजार, रु. ४ हजार र रु. ५ हजार रकम छनौट गर्दै रिमार्कस् राखेर अगाडि बढ्नु पर्छ । त्यसपछि ई–सेवा पिन राखेपछि मोबाइल नम्बरमा ओटीपी कोड प्राप्त हुनेछ । अब एनआईसी एशिया बैंकको एटीएममा रहेको Cardless Withdrawal अप्सनमा गएर Other Cardless र त्यसपछि इ-सेवा छनौट गर्नुपर्छ ।  

यसअघि मोबाइल नम्बरमा प्राप्त ओटीपी कोड राखेर प्रोसिड गरेपछि आफ्नो रकम प्राप्त हुनेछ । हरेक दिन बढीमा ५ वटा कारोबारमा ५ हजार रुपैयाँसम्म र मासिक बढीमा ५० कारोबारमा २५ हजार रुपैयाँसम्मको रकम निकाल्न सकिने सुविधा यस सेवामा उपलब्ध रहेको छ ।