लाभांश र हकप्रदको प्रस्ताव पारित गर्न ग्रीन डेभलपमेन्ट बैंकको एजीएम आज बस्दै

काठमाण्डौ । ग्रीन डेभलपमेन्ट बैंक लिमिटेडको १२ औं साधारण सभा आज आयोजना हुँदैछ । सभा बाग्लुङ नगरपालिकामा रहेको होटल पिस प्यालेसमा बिहान ११ बजेदेखि सुरु हुनेछ । उक्त सभामा गत आवसम्मको वितरणयोग्य सञ्चित मुनाफाबाट ५.७५ प्रतिशत बोनस सेयर र ०.३०२७ प्रतिशत नगद लाभांश(कर प्रयोजनका लागि) गरी कुल ६.०५२७ प्रतिशत लाभांशको प्रदान गर्ने निर्णय पारित हुनेछ । यस्तै, बोनस सेयर जारीपश्चात १ः१.१०७१ अनुपातमा हकप्रद जारी गर्ने प्रस्ताव समेत पारित हुनेछ । सभामा अन्य उपयुक्त बैंक तथा वित्तीय संस्थालाई एक आपसमा गाभ्ने÷गाभिने वा प्राप्तिका लागि सञ्चालक समितिलाई पूर्ण अख्तियारी प्रदान गर्ने प्रस्ताव समेत पारित हुनेछ । सभामा आर्थिक वर्ष २०८०/८१ को सञ्चालक समितिको वार्षिक प्रतिवेदनमाथि छलफल गरी पारित गरिनेछ । यसैगरी लेखापरीक्षकको प्रतिवेदनसहितको २०८१ असार मसान्तसम्मको वासलात, नाफा नोक्सान हिसाब तथा सोहि अवधिको नगद प्रवाह विवरण लगायतका वित्तीय विववरणहरुमाथि छलफल गारी पारित गरिनुका साथै आर्थिक वर्ष २०८१/८२ को लेखापरीक्षणका लागि लेखापरीक्षकको नियुक्ती तथा निजको पारिश्रमिक निर्धारण गर्ने प्रस्ताव पारित गरिनेछ । सर्वसाधारण सेयरधनीका तर्फबाट सञ्चालक समितिमा प्रतिनिधित्व गर्ने २ जना सञ्चालकहरुको निर्वाचन गर्ने र सञ्चालकहरुको मासिक पत्रपत्रिका तथा टेलिफोनको सुविधा रकम वृद्धि गर्ने प्रस्ताव समेत सभाबाट पारित हुनेछ । साधारण सभा तथा लाभांश वितरण प्रयोजनका लागि बैंकले गत चैत १५ गते एक दिनका लागि बुक क्लोज गरिसकेको छ । यसर्थ चैत १४ गतेसम्म नेप्सेमा कारोबार भई कायम सेयरधनीहरुले मात्रै लाभांश प्राप्त गर्न सभामा सहभागी हुन सक्नेछन् ।