.gif)
_(1).gif)
.jpg)
काठमाण्डौ । जीवन बीमा कम्पनीहरुले बीमालेख धितोकर्जा ६ प्रतिशतले बढाएका छन् । सञ्चालनमा रहेका १४ जीवन बीमा कम्पनीले चालु आर्थिक वर्षको दोस्रो त्रैमाससम्म ९५ अर्ब ५४ करोड रुपैयाँ बीमालेख धितोकर्जा प्रवाह गरेका छन् ।
गत वर्षको तुलनामा यस्तो कर्जा प्रवाह ६.१३ प्रतिशतले बढी हो । गत वर्षको यसै अवधिसम्म जीवन बीमा कम्पनीले ९० अर्ब २ करोड रुपैयाँ कर्जा प्रवाह गरेका थिए ।
जीवन बीमा कम्पनीमा बीमालेख धितोकर्जा लिदा बीमितले बीमालेखका अतिरिक्त अन्य कुनै धितो वा जमानी राख्नुपर्दैन । बीमितले कम्पनीमा बुझाएको बीमाशुल्कको आधारमा कम्पनीहरुले कर्जा वितरण गर्न पाउने व्यवस्था छ ।
नेपाल बीमा प्राधिकरणको प्रावधानअनुसार बीमाशुल्कको आधारमा समर्पण मूल्यांकनपछि कम्पनीहरुले बीमितलाई कर्जा प्रवाह गर्ने गर्दछ । बीमितले बीमालेख धितो राखेर कर्जा लिनको लागि कम्तीमा ३ वर्षसम्म बीमाशुल्क (प्रिमियम) तिरेको हुनुपर्दछ । प्राधिकरणका अनुसार बीमितले तीन किस्ताबापत तिरेको शुल्कको ९० प्रतिशतसम्म कर्जा लिन पाउने व्यवस्था छ ।
यस्तो कर्जा प्रवाह गरी जीवन बीमा कम्पनीहरुले ब्याज आम्दानी गरेका हुन्छन् । बीमा कम्पनीहरुले बैंक तथा वित्तीय संस्थाले लिने ब्याज भन्दा सहुलियत ब्याज लिनुपर्ने व्यवस्था छ । अधिकांश बीमा कम्पनीहरुले यस्तो कर्जाको व्याजदर १० प्रतिशतको हाराहारीमा लिने गरेका छन् ।
(1).gif)
बीमालेख धितोमा कर्जा कुनको कति ?
१४ जीवन बीमा कम्पनीले चालु आवको ६ महिनासम्म बीमालेख धितोमा ९५ अर्ब ५४ करोड ४७ लाख रुपैयाँ कर्जा प्रवाह गरेका छन् ।
सबैभन्दा बढी नेपाल लाइफले ३२ अर्ब ७५ करोड रुपैयाँ बीमालेख धितोकर्जा लगानी गरेको छ । त्यस्तै, दोस्रोमा एलआइसी नेपालले २१ अर्ब ९२ करोड रुपैयाँ बीमालेख धितोमा कर्जा लगानी गरेको छ ।
साथै नेशनल लाइफले ११ अर्ब ३३ करोड, राष्ट्रिय जीवन बीमा कम्पनीले ७ अर्ब ९३ करोड, हिमालयन लाइफले ६ अर्ब ५० करोड, एशियन लाइफले ४ अर्ब ८४ करोड, सूर्यज्योति लाइफले ३ अर्ब ९० करोड, मेट लाइफले १ अर्ब ६६ करोड, सानिमा रिलायन्स लाइफले १ अर्ब २४ करोड, प्रभु महालक्ष्मी लाइफले १ अर्ब ४ करोड, सिटिजन लाइफले ७६ करोड, आइएमई लाइफले ६४ करोड, सन नेपाल लाइफले ५५ करोड र रिलायबल नेपाल लाइफले ४२ करोड रुपैयाँ बीमालेख धितोकर्जा प्रवाह गरेका छन् ।
गत वर्षको तुलनामा सर्वाधिक बीमालेख धितोकर्जा लगानी बढाउनेमा रिलायबल नेपाल लाइफ रहेको छ । कम्पनीले यस्तो लगानी ४८.१३ प्रतिशतले बढाएको छ । त्यस्तै, सिटिजन लाइफले २०.५३ प्रतिशत, सन नेपाल लाइफले १४.५० प्रतिशत र हिमालयन लाइफले १३.७८ प्रतिशतले बढाएको छ । सबै कम्पनीले बीमालेख धितो कर्जा लगानी बढाउँदा सूर्यज्योति लाइफको भने ०.८६ प्रतिशतले घटेको छ ।
बीमालेख धितोकर्जाबाट पौने ५ अर्ब रुपैयाँ आम्दानी
जीवन बीमा कम्पनीहरुले यस्तो कर्जा प्रवाह गरी पौने ५ अर्ब रुपैयाँ ब्याज आम्दानी गरेको छ । चालु आवको दोस्रो त्रैमाससम्म १४ जीवन बीमा कम्पनीले ४ अर्ब ७२ करोड ६७ लाख रुपैयाँ ब्याज आम्दानी गरेका छन् ।
यस्तो आम्दानी गत वर्षको तुलनामा २७।०६ प्रतिशतले वद्धि भएको छ । गत वर्षको यसै अवधिसम्म जीवन बीमा कम्पनीहरुले ३ अर्ब ७२ करोड रुपैयाँ यस्तो कर्जा प्रवाह गरी आम्दानी गरेका थिए ।
पुष मसान्तसम्म सबैभन्दा बढी नेपाल लाइफले २ अर्ब ३ करोड रुपैयाँ ब्याजमार्फत आम्दानी गरेको छ । त्यस्तै, एलआइसी नेपालले १ अर्ब ११ करोड, नेशनल लाइफले ४४ करोड, हिमालयन लाइफले ३३ करोड र एशियन लाइफले २७ करोड रुपैयाँ ब्याज आम्दानी गरेको छ ।
गत वर्षको तुलनामा सर्वाधिक यस्तो आम्दानी बढाउनेमा सानिमा रिलायन्स लाइफ रहेको छ । कम्पनीले ६११ प्रतिशतले ब्याजमार्फत आम्दानी वृद्धि गरेको छ ।
त्यस्तै, रिलायबल नेपाल लाइफले ५३४.६९ प्रतिशत, प्रभु महालक्ष्मी लाइफले १२३.८५ प्रतिशत र एशियन लाइफले ९३.३३ प्रतिशतले आम्दानी बढाएका छन् । यता, एलआइसी नेपाल र आइएमई लाइफ इन्स्योरेन्सको भने यस्तो आम्दानी गत वर्षको तुलनामा घटेको छ ।
.gif)
.jpg)
.png)
.gif)
.gif)
