नवील बैंकको पहिलो त्रैमासिक नतिजा स्थिर, नाफा घटे पनि गुणस्तरमा सुधार

काठमाण्डौ । नवील बैंक लिमिटेडको आर्थिक वर्ष २०८२/८३ को पहिलो त्रैमासमा अघिल्लो वर्षको तुलनामा नाफा घटेको छ। असोज मसान्तसम्म बैंकले १ अर्ब ७५ करोड ६९ लाख रुपैयाँ खुद नाफा आर्जन गरेको छ, जुन अघिल्लो वर्षको सोही अवधिको २ अर्ब ५ करोड रुपैयाँभन्दा १४.५७ प्रतिशत कम हो।

ब्याज आम्दानी घट्दा कुल आम्दानीमा गिरावट

बैंकको खूद ब्याज आम्दानी ५.७७ प्रतिशतले घट्दै ३ अर्ब ९ करोड रुपैयाँमा सीमित भएको छ। अघिल्लो वर्षको सोही अवधिमा यो रकम ४ अर्ब १४ करोड रुपैयाँ थियो।

ब्याज दरमा आएको गिरावट र कर्जाको विस्तार सुस्त हुँदा बैंकको ब्याज आम्दानीमा प्रत्यक्ष असर परेको देखिन्छ।

त्यस्तै,खूद शुल्क तथा कमिसन आम्दानी ६.२९ प्रतिशतले बढ्दै ७९ करोड ८७ लाख रुपैयाँ पुगेको छ, जसले बैंकको सञ्चालन आम्दानीमा केही सहारा पुर्‍याएको छ।

तर, कुल सञ्चालन आम्दानी भने १.०३ प्रतिशत घट्दै ५ अर्ब २७ करोड रुपैयाँमा सीमित भएको छ। सञ्चालन नाफा पनि १०.८४ प्रतिशत घटेर २ अर्ब ५८ करोड रुपैयाँमा झरेको छ।

निक्षेप र कर्जामा स्थिर वृद्धि

बैंकको ग्राहक निक्षेप ५५६ अर्ब ६१ करोड रुपैयाँ पुगेको छ, जुन गत आवको अन्त्यमा रहेको ५२४ अर्ब ८२ करोड रुपैयाँभन्दा ६.१० प्रतिशतले वृद्धि हो।

त्यस्तै, कर्जा प्रवाह पनि १.९९ प्रतिशत बढ्दै ४२१ अर्ब रुपैयाँमा पुगेको छ।

वितरणयोग्य नाफा र प्रतिशेयर आम्दानी

असोज मसान्तसम्म बैंकको वितरणयोग्य नाफा (Distributable Profit) ५ अर्ब ६३ करोड रुपैयाँ पुगेको छ।

प्रतिशेयर आम्दानी (EPS) २५ रुपैयाँ ९७ पैसा मात्र रहेको छ, जुन अघिल्लो वर्षको २९ रुपैयाँ ८३ पैसाभन्दा कम हो। तर वितरणयोग्य प्रतिशेयर आम्दानी (Distributable EPS) ३० रुपैयाँ १५ पैसा पुगेको छ, जसमा वृद्धि देखिएको छ।

सुदृढ पुँजी 

नवील बैंकको नेटवर्थ प्रतिशेयर २४० रुपैयाँ ७२ पैसा पुगेको छ।

बैंकको पुँजी पर्याप्तता अनुपात (Capital Fund to RWA) १२.६७ प्रतिशतमा स्थिर छ।

त्यस्तै, बैंकको निष्क्रिय कर्जा (NPL) ०.९७ प्रतिशतमा झरेको छ, जुन अघिल्लो वर्षको १.४२ प्रतिशतभन्दा राम्रो हो।

बैंकको बेस रेट ५.५८ प्रतिशत र ब्याजदर अन्तर (Interest Rate Spread) ३.५१ प्रतिशत रहेको छ। अघिल्लो वर्षको तुलनामा बेस रेट १.४४ प्रतिशतले घटेको हो, जसले बजार ब्याजदरमा सहजता आएको संकेत गर्छ।

समग्रमा, नवील बैंकले स्थिर निक्षेप र कर्जा वृद्धिसँगै परिसम्पत्तिको गुणस्तर सुधार गरेको छ। तर ब्याज आम्दानी घट्दा नाफामा दबाब परेको छ। आगामी त्रैमासमा ब्याजदर र कर्जाको प्रवाहमा सुधार आए बैंकको लाभांश वितरण क्षमता अझ मजबुत हुने अनुमान गर्न सकिन्छ ।