एक महिना १.८७% ले मात्रै बढ्यो नगद परिचालन,बैंक तथा वित्तीय संस्थाहरुको निक्षेप १५.४५% ले घट्यो

NEPAL RASTRA BANK
मंगलवार, चैत्र १३,२०८० 10:19:29

काठमाण्डौ । एक महिनाको अवधिमा बजारमा नगद परिचालन १.८७ प्रतिशतले वृद्धि भएको छ । नेपाल राष्ट्र बैंकले सार्वजनिक गरेको फागुन महिनाको वित्तीय विवरणमा यस्तो देखिएको हो ।

विवरण अनुसार फागुन महिनासम्ममा बजारमा ६ खर्ब ६४ अर्ब ८७ करोड रुपैयाँबराबरको नगद परिचालन भएको छ । जुन गत माघ महिनाको तुलनामा १.८७ प्रतिशतले मात्रै बढी हो । माघ महिनासम्ममा बजारमा ६ खर्ब ५२ अर्ब ६२ करोड रुपैयाँबराबरको नगद परिचालन भएको थियो ।

गत असार महिनासम्म भने बजार ६ खर्ब २५ अर्ब रुपैयाँ नगद परिचालन भएको थियो ।

फागुन महिनासम्म केन्द्रीय बैंकमा बैंक तथा वित्तीय संस्थाहरुको निक्षेप २ खर्ब २५ करोड रुपैयाँ पुगेको छ । जुन माघ महिनाको तुलनामा १५.४५ प्रतिशतले कम हो । माघ महिनासम्म केन्द्रीय बैंकमा बैंक तथा वित्तीय संस्थाको निक्षेप २ अर्ब ६६ करोड रुपैयाँ थियो ।

यस्तै राष्ट्र बैंकमा सरकारको निक्षेप समेत घटेको छ । माघ महिनासम्म १ खर्ब ८४ अर्ब सरकारी निक्षेप रहेकोमा फागुनसम्म घटेर १ खर्ब ७८ अर्बमा सीमित भएको छ ।

फागुन महिनासम्म राष्ट्र बैंकमा बैंक तथा वित्तीय संस्थाले ७ अर्ब ८१ करोड रुपैयाँबराबरको विदेशी मुद्रा निक्षेप गरेका छन् । जुन माघ तुलनामा १२.७५ प्रतिशतले कम हो ।

फागुन महिनासम्ममा राष्ट्र बैंकको कुल स्वेदेशी मुद्रा सम्पत्ति १ खर्ब ६ अर्ब रुपैयाँबराबर र कुल स्वदेशी दायित्व १२ खर्ब ८१ अर्ब रुपैयाँबराबर रहेको छ ।

यस्तै कुल विदेशी मुद्रा सम्पत्ति १७ खर्ब ५२ अर्ब र कुल विदेशी मुद्रा दायित्व ४८ अर्ब ३८ करोड रुपैयाँबरारब रहेको छ ।